لو بطلنا نحلم نموت

السلام عليكم ورحمه الله وبركاته

دى أول حاجه ممكن أكتبها فى البلوح بتاعى .. أزيكم يا جماعه ..انا مش عارفه يا جماعه انا عملت البلوج ده فجأه كده مع أنى من زمان أعرف عن البلوجات بس حسيت أنى عايزه أجرب أكتب زى ما كل الناس بتكتب يمكن الكتابه بتخفف عن الواحد شويه ويمكن كمان علشان أنا مخلصه كليه من سنه وزهقت لأن الحياه بقت على روتين واحد قولت أجرب حاجه مختلفه يمكن أقدر أفيد حد أو حد يفيدنى

بس بجد أنا عمرى ما جربت أكتب حاجه الناس تقراها انا قولت هعمل البلوج وأكتب فيه المذكرات اللى كنت كاتبها من كام سنه بس فعلا حسيت أنى مقدرش أحس أن حد بيقرى الكلام اللى كنت كاتبه لنفسى المهم يارب أقدر أكتب حاجه والكل يسامحنى لآنى فعلا معنديش موهبه الكتابه بس مجرد محاوله وأكون ضيفه خفيفه على أى حد يقرى ليه حاجه

أول هتكلم فيها هى اول حاجه بتوصل لآى حد عن بلوج بتبقى أسم البلوج .. يعنى أنا عن نفسى أول حاجه باخد بالى منها أسم البلوج وأيه سبب تسميه البلوج كده

ودى أول حاجه هكتبها عندى أنا سميت البلوج حياه الأحلام ممكن الناس تستغرب هو فيه حياة فى الأحلام بس بجد يا جماعه معرفش ليه طول عمرى وانا الأسم ده معلق معايه يمكن علشان نفسى أعيش حياتى أحلامى مش عايزه أعيش زى الناس كلها ما هى عايشه يعنى عايزه أعيش حياة الأحلام فى كل حاجه فى حياتى العامه وحياتى المستقبليه إن شاء الله يعنى مش عايزه اعيش عادى وإن شاء الله أتجوز عادى وخلاص وأهى الدنيا بتمشى وأخلف عادى وأموت فى الآخر برضه عادى لأن دى أسوء حاجه فى الدنيا أنك تعيش عادى

ليه كل واحد فينا ما بيحطش حياة أحلام ليه ويحاول يوصلها حتى لو الدنيا كلها قالت أنه بكره يعيش فى الواقع ويتصدم ليه كل واحد ما يحاولش يحققها لو كل واحد بدأ بنفسه لو كل واحد بدأ بأول خطوه إنه يفكر هو حياة أحلامه شكلها إيه أو عامله أزاى .. عايز يعيش أزاى زى كل الناس مهى عايشه ولا عايز يكسر الواقع ده

تفتكروا كلامى صح ولا غلط ولا كلام كل اللى حواليه اللى صح وأنى بكره هتصدم فى الدنيا والواقع وأنى المفروض أعيش فى عالم تانى وأنى المفروض أتغير ومابقاش هبله بمفهوم الزمن ده لأن الطيبه فى الزمن ده الناس بتقول عليها هبل .. بس بجد لما بقعد أبص حواليه بلاقى الدنيا كلها تمثيل الناس كلها بتمثل على بعضوبتجرى ورا المصالح والماديات وكل الحاجات اللى مش بتنفع ولا فى الدنيا ولا فى الأخره اللى هى أهم من الدنيا كلها ليه الناس مش بتفكر أن الدنيا ممكن تكون لحظه ليه كل واحد ما يكنش نفسه ولو فيه حاجه وحشه يطور منها ليه ما يبقاش لكل واحد حياه أحلام ليه الحب بجد بين البشر ضاع فى الزمن ده خالص ألا قليل جدا .. أنا عايزه كل واحد يقولى حياة أحلامه شايفها أزاى لو عنده حياة أحلام فى كل حاجه فى حياته ولو مش عنده يبقى يقولى ليه عمره ما فكرش فيها؟؟؟

لأننا

لو بطلنا نحلم نموت ...لو عاندنا نقدر نفوت

لو عدينا مره خلاص لو ردينا ضاعت خلاص

حبه صبر حبه حماس يبقى الحلم صوره وصوت

لو بطلنا نحلم نموت

مره فى مره حاول كتير أى مغامره راح تنفعك

حبه صبر حبه حماس يبقى الحلم صوره وصوت

لو بطلنا نحلم نمووووت

حلمك لسه فى أيديك حاول ما يموتش فيك

وأسفه أنى طولت عليكم

سلام