Sunday, January 6, 2008

مفهوم النجاح


السلام عليكم

أولا.. كل سنه والكل بألف خير يارب مقدما وعام هجرى سعيد وياريت كلنا الساعه 12 نصلى وندعى لربنا وسنه جميله سعيده يارب ونحقق كل حاجه بنتمناها يارب لان السنه الهجريه ما تقلش أهميه بل تزيد عن السنه الميلاديه أهميه..
ثانيا شكرا لكل اللى سأل عليه فى المدونه فى غيابى بس الحمد لله عودنا بعد دور البرد الجميل انتو عارفين المرض وحكم السن وكده :)
نجى بقى لموضوعنا النهارده عايزه أتكلم عن مفهوم النجاح بما أننا فى فتره أمتحانات الأيام دى والناس حواليه كلهم بيذكروا وأنا خلاص بتفرج عليهم أخيرا

فى الأول السؤال مفهوم النجاح فى كل حاجه يعنى أيه ؟

وأيه هو مفتاح النجاح فى كل حاجه وفى كل مراحل حياتنا

هل يعنى النجاح مجرد أنهاء الشىء والوصول للمرحله التاليه؟؟ ولا... أيه اللى قدرنا نستفيده من كل مرحله
يعنى النجاح فى الآمتحانات والكليه مفهومه عن كل الناس أننا ندخل الأمتحانات والنتيجه تكون ناجح ولا أننا نكون نجحنا اننا حصلنا على قدر من المعلومات للأسف مفيش المفهوم ده خالص أنا عن نفسى مش فاكره اى حاجه من الكليه الا قليل جداجدا

مفهوم النجاح فى الشغل أنى أشتغلت شغلانه كويسه أسما وخلاص حتى لو كان بالواسطه مش بمجهودى نجحت او انى اترقى وخلاص ولا أنى انجح واتقن فى شغلى وأحقق كل المقصود من الشغل أن أنا نفسى أكون سعيد بشغلى ده وأبقى بحبه من جوايا وأحقق أهدافى وطموحاتى منه مش مجرد شغل علشان اجيب فلوس ومرحله من المراحل

هل مفهوم النجاح فى العلاقات الانسانيه مع الأب والأم والأخوات أو...أنى أعيش معاهم وأكل وأشرب ومرحله وتعدى ولا أنى أقدر أنجح فى أهداف المرحله دى وأكون حققت كل المطلوب منى وقدرت أطلع منها باللى يأهلنى للمرحله الجايه وأنى أكون عشت وتعايشت وقضيت كل لحظه حقيقه وجميله معاهم بجد مش مجرد اكل وشرب وحياه تكون أبن صح أو أخوه صح


هل مفهوم النجاح فى أختيار زوج أو زوجه هو أنها تبقى بموصفات 123 وأول ما نلاقى الموصفات نبقى كده نجحنا فى الأختيار ولا مفهوم النجاح هو الأختيار الصح اللى بمقايس ترضى ربنا وأعرف أبنى حياتى الزوجيه وبيت سعيد بيها بعد كده


هل النجاح فى أنى أحب بجد الشخص مناسب هو نجاح مظهرى فقط بالكلام ولا لازم يكون بالفعل الحقيقى اللى يحافظ على أختيارى الصحيح

هل نجاح الفرح وليله العمر بتتقاس بالفرح كان فين وشكلى كان أيه ولا النجاح أننا نبقى مبسوطين من جوانا بجد والفرحه فى عنينا ونكون وعرفنا نختار

هل النجاح فى الجواز أن الناس تتجوز وخلاص بدون أدراك مفهوم الجواز وأننا نتعامل معاه كمرحله ولازم نعدى عليها ولا النجاح فى فهم نوعيه العلاقه المقدسه دى وهدفها الأساسى فى وجود شخصين يكونوا كيان واحد أحساسهم واحد فى كل حاجه مش مجرد جواز وعيشه وأكل وولاد وخلاص

كذلك مفهوم أن كل واحد ينجح ويجيب أولاد انه يجيب أولاد وخلاص ولااا أنه ينجح فى تربيتهم تربيه صح فى كل حاجه فى الفكر والدين و يقدر يفتخر بيها ويفرح ربنا بيهم

هل مفهوم النجاح فى أتمام العبادات لربنا هو أنى أقضى العبادات دى وخلاص يعنى أصلى وأصوم وأحج وأنجح فى أتمامهم

ولا مفهوم النجاح أن الصلاه تبقى من جوه الأنسان قبل كل شىء وتغير الحاجات الوحشه وتبقى بجد لربنا وأنى أصوم بجد لما أصوم مش مجرد صيام بطن وأنى أحج بنيه خالصه مش مجرد فروض وبتخلص

هل مفهوم النجاح فى عمل الخير أنى أعمل خير وأخلص وخلاص ماديا ولا الأهم معزى الخير أنى أقدر أسعد حد من جواه بجد


وأخيرا هل مفهوم النجاح فى الدنيا أنى أتعلم وأتجوز وأشتغل وأموت وخلاص ؟؟؟


ولا مفهوم النجاح فى كل حاجه من دول فيه أهداف ومغزى تانى خالص

مش عارفه هو مفهوم حيرنى كتير قولت أشاركم الرأى فيه

أنتو أيه رأيكم

ويارب كل واحد يقدر يوصل لمفتاح النجاح الصح فى كل مراحل حياتهم

طبعا أنا ما بتكلمش عن مفهوم النجاح بطريقه علميه ..أو مفهومه من خلال التنميه البشريه وأدراه النفس البشريه لان ده كلام علمى بحت أنا معنديش الخلفيه الجيده أنى أتكلم فيهم

Monday, December 31, 2007

HaPpY NeW YeAr


أكشششششششششششن أخر بوست فى 2007

أزيكم كلكم وحشتونى كلكم ووحشتنى المدونه ..وكل سنه وأنتو طيبين وسنه جديده جميله يارب علينا كلنا ..سنه راحت وسنه جت والعمر بيفوت وهنتحاسب على عمرنا ..يارب تكون السنه الجديده الحلو فيها أكتر من الوحش لان الدنيا يوم حلو ويوم وحش

وكل واحد يحاسب نفسه عمل أيه ويشوف حصاد السنه اللى فاتت أيه اللى وحش وأيه اللى حلو ..ويشوف السنه الجديده هيعمل أيه وخطواته ناحيه ربنا وناحيه أحلامه هتمشى أزاى ..ولازم رغم كل اليأس كلنا نبدأ السنه الجديده بأمل وتفاؤل ان شاء الله


معلش أنا مقصره فى حق المدونه وأعزرونى فى تقصيرى فى الزياره للمدونات وأوعوا حد يزعل منى والرد على التعليقات لانى من العيد وأنا كنت تعبانه بجد أوى وما بقعدش على الكمبيوتر وما تعرفوش أنا كتبت البوست ده بمعاناه أزاى وعندى برد جامد جدا بكره الشتاااااااااااااااا وكانت حالتى يرثى إليها وكان صديقى الصدوق هو السرير والدوا بس الحمد لله ومعلش تعباكى دايما معايا يا ماما...بس إيه شويه وسنعووود أن شاء الله بقوه وعضلات

بس قولت لازم اقول للكل كل سنه وأنتم بخير ويارب كل واحد يحقق كل حاجه بيتمناها فى السنه الجديده أو على الأقل يمشى خطوه

ناحيه أحلامه

وعايزين كلنا أن شاء الله الساعه 12 بدايه السنه الجديده فى الوقت اللى ناس كتير أوى بتعصى ربنا فيه..نعبد احنا ربنا وصلى ركعتين لربنا وندعى بالخير لينا ولكل الناس ونستغفر ربنا كتير ونقرى قرآن كتير علشان تكون بدايه السنه بحاجه لربنا... وأوعوا حد يقضيها فى جزيره القطن عارفين هى أيه ؟؟مش هقولكم

وأمانه كلكم تدعولى معاكم وأنا هدعي للكل أن شاء الله


2007-2008


HaPpY NeW YeAr


سلاااام علشان كده أنا فصلت خلاص أشوفكم السنه الجااااااااااااااااايه

Tuesday, December 18, 2007

كل سنه والكل بألف خير يارب..عيد سعيد هيييه

كل سنه وأنتم طيبين وعيد سعيد على الجميع يارب ويكون كله فرح وسعاده ..ويارب يكون عيد جميل خالص خالص على الكل
وما تكتروش فى اللحمه وكل ما حد ياكل لحمه زياده عن حاجته يفتكر ان فى غيره محتاج ليها أكتر منه
معلش كلمتين فى السريع كده وكان نفسى أدخل على مدونه مدونه أقول لكل واحد كل سنه وهو طيب وتأخيرى فى التعليق عندكم بس أعزورنى صدر الفرمان ومسافرين دالوقتى حالا
بجد فرحانه أوى علشان العيد وكل سنه والكل بألف خير وربنا يعيد الأيام عليها بالخير دايما وأشوفكم على خير ان شاء الله ومحدش ينسى العيديه أنا ما بتفرقش معايا عيد صغير من كبير وكل واحد كيلو لحمه وهو داخل كده ما يدخلش فاضى مع ان الخروف بيصعب عليه اوى بس مفيش أمل هيدبح هيدبح
:D
أشوفكم على خير أن شاء الله ومحدش ينسى ياخد شويه ورد من فوق وخروف من تحت شوفتوا أنا كريمه أزاى لما نشوف ..
يا حرام فرحانين مش عارفين اللى هيجرالهم
يلا سلااااااااام

Tuesday, December 4, 2007

"نفسك تبقى كيس جوافه"


أزيكم كلكم..بما أنى بقالى فتره ما كتبتش ومكنش فى دماغى حاجه معينه ... فجأه كده حبيت أكتر عن حاجه أستفزتنى بجد
هقولكوا وقولوا كلمتكم أنتو بقى
.
من كام يوم خير اللهم أجعله خير كنت معزومه فى فرح واحده زميلتى فى كورس ..المهم قولت برضه واجب أروح طالما أتعزمت لانى ما بحبش أروح فرح الا لو صحابى أوى

المهم شديت الرحال أنا وأتنين صحابى ورحنا الاول على الأستديو علشان قولنا نسلم ونمشى على طول لحد دالوقتى مفيش حاجه غريبه
.....................
وفجأه وبدون سابق أنذار تتتتتتتتتتتتتتتن كده أتصدمت افتح عين وأغمض عين مفيش فايده حاسه انى لقيت واحده تانيه غير زملتى ..
يعنى زملتى بحجاب لقتها بشعرها ....زملتى لبسها كويس لقيت لبس تانى..أذبهدليت فى الأول وزعلت منهاو بجد أتضايقت أوى وأستغربت وفضلنا شويه واقفين فى الأستوديو

لقيت أن كل العرايس نفس النظام شعر ولبس غريب بصراحه
وواحده بتنادى عريسها يا توتو "توتو النوتو كمانتو " هما الشباب بقوا شباب نايتى ..فضلت أدور على عريس ممكن يتقال عليه راجل مفيش كله جوافه
قولت ايه البنات الغربيه دى.. وبعدين قولت العيب مش عليهم لوحدهم العيب على الراجل قصدى "كيس الجوافه

أنا بقى أتضايقت مش بس علشان حرام وحلال لان كل واحد عارف كويس الحرام والحلال ..أنا بقى حسيت أن كليو الجوافه بقى بقرشين يعنى يعنى عايزه أسأل سؤال
هو يعنى أزواج البنات دول بيبقوا رجاله كده وبيحسوا وبيغيروا وبيحبوا وعندهم أحساس ودم ولا أكياس جوافه جنب زوجاتهم ؟؟؟؟

بصراحه أنا شايفهم أكياس جوافه ولو فيه حاجه غير الجوافه كان ممكن ..يمشى برضه قرطاس لب

يعنى عايزه افهم يا جماعه فهمونى الله يكرمكم أزاى واحد راجل "كيس جوافه معلش مصره بقى "
و كمان لما رحت القاعه والمنظر ده بيتكرر كتير ..سايب مراته وواقف جنبها وهى بشعرها وبلبسها والهيصه دى وياريتها هيصه عاديه دى فى دايره ولاد كمان وهى وهو مش ساكتين يعنى" شغااااااااال يونفرسال" ..ده بيفرج عليها الناس ولا أيه؟؟

..أنا أفهم أن الحب خوف يعنى أخاف عليها من كل عين ومن كل حاجه ده غير طبعا أول حاجه ان كل ده حرام والدين..ده غير أنه المفروض دمه حامى كده ويغيره عليها مش سايبها بيفرج اللى يسوى واللى ما يسواش عليها

يا شباب اوعوا حد فيكم يكون كيس جوافه دى مراتك أغلى حاجه عندك اللى تخاف عليها من كل حاجه أغلى جوهره عندك يعنى مهياش هيفا ولا العالم دى ..مراتك اللى انت هتتحاسب عليها وعلشان ربنا يبارك ليكم فى حياتكم .."فأظفر بذات الدين تربت يداك"...و من غير زعل اللى هيزعل من كلامى ده .. يبقى هو عنده أستعداد يبقى كيس جوافه وأنا أكتر حاجه بكرها الجوااااااافه

ويا بنات ما تضحكوش الشيطان علينا ولا الولاد علينا...
يعنى اللى تبقى بحجاب طول عمرها ...وتجى يوم ما تبقى فى عصمة راجل راجل راجل... تفرجى كل الناس عليكى ..
أنا عايزه أفهم بأنهى منطق ده؟؟
والحجاب حجاب قلب كمان مش مجرد طرحه لفها وعامله حاجات غريبه فى برمودا وحاجات غريبه بشوفها وكمان هو مش مجرد طرحه تتقلع فى مناسبه فى ضيوف فى مصيف فى شهر عسل فى وفى وفى
الحجاب حاجه أكبر من كده بكتير فرض علينا علشان ربنا عايز يحمينا لان البنت جوهره غاليه

وصدقينى عمر فرحتك ما هتبقى باللبس والشعر ولا الهيصه فرحتك بالأمير بزوجك الأنسان اللى بجد يكون راجل اللى يتساهلك اكبر من أى فرحه ..حتى لو مفيش فرح خالص مجرد وجود معاك اكبر فرحه

وبعدين بدء حياة جديده ما تبقاش بحاجه تزعل ربنا مننا
والله فرحتك هتبان على وشك حتى لو بحجاب وجمالك البرىء هيبقى أحلى من مليون شعر ومليون لبس

والكلام ده مش كمان فى الفرح بس ده ساعات بيكون صفه كيس جوافه غالبه على الراجل تلاقيه ماشى كده جنب مراته وبيضحك كده عرض بقه وفارد سنانه وهى لابسه وعامله ما لا يعمل

طيب انا عايزه أفهم فرحان بأيه بشبابه ولا علشان يفرج الناس انا مراتى حلوه اللهم أحفظنا من أكياس الجوافه

أنا كنت أعرف أن مصر كلها شباب رجاله زى الفل دمهم حامى ..دالوقتى الجوافه كترت اوى ورخصت بزياده

أرجوكم أرجوكم أرجوكم أوعوا حد يكون كيس جوافه أحسن هحس أن معدش فيه رجاله فى مصر خالص
هى الرجاله والرجوله راحت فين ..قربت تخلص ولا أيه
بجد عايزه رأيكم بنات وولاد... وكل واحد يقول وجهة نظره بمنتهى الأخلاص

وربنا يحمينى ويحمى كل البنات من أكياس الجوافه.. اللهم آمين
وفعلا فى الأخر بقول الطيور على أشكالها تقع ..وكل واحد على قد نيته
الموضوع طرحته بصوره فكاهيه بس هو أكبر من كده بكتير ومحتاج كلام كتير بس المهم تكون الفكره وصلت يارب

Monday, November 19, 2007

يحكــــى أن

معلش أنا متأخره فى تنزيل بوست جديد بس لسه فى حاله مش عارفه اكتب حاجه بس دى قصه جميله حبيت أنقلها ليكم علشان كلنا نستفيد
يارب تعجبكم القصه إن شاء الله
يحكى ان
أن رجلا كان يتمشى في أدغال افريقيا حيث الطبيعة الخلابة وحيث تنبت الأشجار الطويلة، بحكم موقعها في خط الاستواء وكان يتمتع بمنظر الاشجار وهي تحجب اشعة الشمس من شدة كثافتها ، ويستمتع بتغريد العصافير ويستنشق عبير الزهور التي التي تنتج منها الروائح الزكية.
وبينما هو مستمتع بتلك المنا
ظر
سمع صوت عدو سريع والصوت في ازدياد ووضوح
والتفت الرجل الى الخلف
واذا به يرى اسدا ضخم الجثة منطلق بسرعة خيالية نحوه

ومن شدة الجوع الذي الم بالأسد أن خصره ضامر بشكل واضح.
أخذ الرجل يجري بسرعة والأسد وراءه
وعندما اخذ الأسد يقترب منه رأى الرجل بئرا قديمة
فقفز الرجل قفزة قوية فإذا هو في البئر
وأمسك بحبل البئر الذي يسحب به الماء
وأخذ الرجل يتمرجح داخل البئر
وعندما أخذ انفاسه وهدأ روعه وسكن زئير الأسد

واذا به يسمع صوت زئير ثعبان ضخم الرأس عريض الطول بجوف البئر
وفيما هو يفكر بطريقة يتخلص منها من الأسد والثعبان

اذا بفأرين أسود والآخر أبيض يصعدان الى أعلى الحبل
وبدءا يقرضان الحبل وانهلع الرجل خوفا
وأخذ يهز الحبل بيديه بغية ان يذهب الفأرين

وأخذ يزيد عملية الهز حتى أصبح يتمرجح يمينا وشمالا بداخل البئر
وأخذ يصدم بجوانب البئر

وفيما هو يصطدم أحس بشيء رطب ولزج
ضرب بمرفقه
واذا بذالك الشيء عسل النحل
تبني بيوتها في الجبال وعلى الأشجار وكذلك في الكهوف
فقام الرجل بالتذوق منه فأخذ لعقة وكرر
ذلك ومن شدة حلاوة العسل نسي الموقف الذي هو فيه

وفجأة استيقظ الرجل من النوم
فقد كان حلما مزعجا !!!

وقرر الرجل أن يذهب الى شخص يفسر له الحلم
وذهب الى عالم واخبره بالحلم فضحك الشيخ وقال : ألم تعرف تفسيره ؟؟
قال الرجل: لا
.
قال له الأسد الذي يجري ورائك هو ملك الموت
والبئر الذي به الثعبان هو قبرك
والحبل الذي تتعلق به هو عمرك
والفأرين الأسود والأبيض هما الليل والنهار يقصون من عمرك
....
قال : والعسل يا شيخ ؟؟
قال هي الدنيا من حلاوتها أنستك أن وراءك موت وحساب

يارب يكون وصلنا مضمون القصه والدنيا ما تنسيناش ان فيه موت وحساب
اللهم لا تجعل الدنيا أكبر همنا ولا مبلغ علمنا ولا إلى النار مصيرنا وأجعل الجنة هي دارنا يا أرحم الراحمين .

Thursday, November 8, 2007

أبى ..أبى .. أرجوك لا تموت


أعزرونى بجد مش قادره أكتب حاجه من يوم خبر وفاه بهلوله ومع أنى عمرى ما أتكلمت معاها وكانت مجرد تعليقات بس لما كانت تدخل وتعلق وتقولى انا كل ما ادخل ألاقيكى نايمه طيب هعلى صوتى وأصحيكى وحاجات كتير كل ما أفتكرها حزنت أوى كأنها حد قريب منى أوى أوى.. بجد من أكتر الناس اللى أثرت فيا ربنا يرزقها الفردوس الأعلى أن شاء الله ويرحمنا جميعا
ونعرف قد إيه الدنيا لحظه وأن الموت قريب منى مش بعيد ولا حاجه حتى لو كنت لسه صغيره خوفت أوى بجد وقعدت افكر دى كانت بتكتب بوست زينا وبتعلق وفجأه تتوفى ..يارب أرزقنا حسن الخاتمه

..حبيت أنقل ليكم قصه منقوله بس جميله وأنا شخصيا أستفدت منها كتير هى وكلمات وقصص كتير هبقى أنقلها ليكم ولو أن ناس هتقول البلوج المفروض ما يبقاش فيه حاجات منقوله بس الحاجات دى أنا أستفدت منها وعايزه كلنا نستفيد



السلام عليكم ،، دى قصة حقيقة وقعت في إحدى الليالي

لقد جاء والدها الكبير في السن من المزرعة متأخرا في إحدى الليالي ...
وكان متعبا جدا إثر الطريق الطويل الذي قطعه علما بأنه هو السائق نفسه...
هرعت الفتاة مسرعة نحو غرفة والدها كي تجهز له سريره .. ليرقد
عليه علَّه يخفف عن بعض التعب ...
وبعد أن اغتسل ولبس ملابسا غير تلك التي كان يرتديها .. وتوضأ وصلى ركعتين
لوجه الله
ولما فرغ من صلاته أخذت ابنته بيده إلى فراشه بعد أن اتكأ عليها ...
عندها تمدد والدها ، سألته : هل تناولت عشاءك ؟
قال : سأخلد للنوم ، وان كان لنا حياة لغد إن شاء الله سنأكل
..
قالت له ابنته : ولكن لا يصح أن تنام دون أن تتناول شيئا ..
فأشار لها موحيا لها بأنه لا يرغب شيئا ...
قالت له ابنته : ما رأيك بكأس لبن .. ابتسم والدها ولم يجيبها
سعدت الفتاة بذلك وذهبت مسرعة نحو المطبخ تناولت كأسا ووضعت به اللبن
ونظرت أسفل الثلاجة ووجدت سلة مليئة بالرطب ..
واستلذت لوالدها سبع تمرات .. وضعتها في طبق وخرجت مسرعة ...
نادتها أختها الصغيرة قائلة لها : تعالي بسرعة وانظري إلى هذا..!!
وما لبثت أن ذهبت إليها اختها .. وقالت : ماذا تريدين إني على عجالة من
أمري ..
قالت الأخت الصغيرة : لا عليك خمس دقائق لن تأخذ من وقتك الشيء الكثير..
تعالي وانظري المجرم سوف يقتل بطلة الفيلم .. كانت الأخت تتابع فيلما
في جهاز التلفزيون...
وقفت الأخت الكبرى وهي تمسك كأس اللبن والتمرات بيدها ولم يتسن
لها أن تجلس...
بل ظلت واقفة على ذلك يعجل من المشهد المرعب .. خمس دقائق ثم
انتهى ذلك المشهد ..
اعتدلت الأخت الصغرى في جلستها وكأنها مرت بموقف صعب لم
تكن تعلم كيف تخرج منه ..
ثم استطردت أنفاسها قائلة : سأحكي لك قصة هذا الفيلم .. في الحقيقة هذا..
ولم تكمل حديثها بل قاطعتها الأخت الكبرى قائلة لها : انتظري قليلا سأذهب
لوالدي أعطيه كأس اللبن هذا ثم آتيك لتقصي علي الفيلم...
وذهبت مسرعة اتجاه غرفة والدها .. وهناك وجدت والدها ساكنا .. اقتربت منه
فوجدته قد نام ...
لم تكن تفكر آن توقظه لولا أنها تذكرت ابتسامته لها بأنه يرغب
بشرب كأس اللبن
...
قالت لنفسها : سوف أوقظه كي يشرب الكأس .. ثم اتركه ينام ملء جفنيه...
وبدأت بخفة تضع يدها على كتفه وتقول له بصوت مرهف : أبي .. أبي .. أبي
فلم يجبها..؟؟
أعادت النداء عليه ولكن هذه المرة بصوت مرتفع قليلا ولم يجبها أيضا
...
رفعت صوتها أكثر وقالت : أبي هل تسمعني لقد جئتك بكأس لبن بارد ولذيذ
وبضع تمرات طيبة أبي .. أبي ...
اغرورقت عيناها . فبدأت تهز والدها بقوة وتقول : إنها خمس دقائق يا والدي..
خمس دقائق تفرق بيننا.. والله ما كنت اقصد بتأخري إنها زينب هي التي أخرتني
أبي .. أرجووك .. لا تمت وأنت غاضب أرجــــوك..

وسار الحزن في الأجواء .. تتخلله شهقات الأسف والحسرة ...
اسف وحسرة على حال الوالد .. لا .. بل هي تعلم بأن والدها رجل خير...

وإن شاء الله سيتوفاه برحمته .. التي تعلو كل رحمة ..
لكنها تبكي حزنا .. ألما وحسرة أسفا .. لحالها .. فلقد حرمت نفسها من أن
تبر بوالدها في آخر لحظـة من حياته .. فنزعت من نفسها أجرا كاد يكتب لها...
اللهم لا اعتراض على حكمتك وقضائك وقدرك...
إنما اعتراض على حالنا .. فنحن نتهاون بالساعات والأيام والأشهر
والسنيـن .. دون أن نفيق من غفلتنا ...
فهذه خمس دقائق فقط ...
فارق فيها والدها الحياة دون وداع
...

أبى ..أبى .. أرجوك لا تموت


وأخيرا الموت مش هو بس اللى بيفرق بين أنسان وأنسان ممكن تبقى مع أهلك وبين ناس كتير وفى بيت واحد وأنت مش حاسس بحد فيهم عايش حياتك وكأنهم واقع موجودين وما تحسش بيهم ولا هما حاسين بوجودك ألا لما يروحوا منكم ..لازم كلنا نحس بأهلنا ونعرف أن مجرد لحظات تفرق بينا وبينهم ونرجع نندم يوم لا ينفع الندم وكمان كما تدين تدان وفى يوم من الأيام هتحس باللى حسوا بيه..


القصه منقوله للأفاده وربنا يخلى كل أب وأم ونكون كلنا أبناء صالحين ويارب يكون أبويا وأمى راضين عنى ولو رضا بسيط وعايزه رأى كل واحد فيكم وضيعنا كام خمس دقايق من أبونا وأمنا وأهلنا وزعلناهم كام مره وقولنا اوف حتى فى سرنا كام مره؟؟ومين فينا بيعمل أكتر من كده وما يعرفش أن اللحظه ممكن تفرق ..وعملنا إيه لربنا لحد دالوقتى

فى الأخر ..ربنا يخليكم ليا يا أبى وأمى وسامحونى لو زعلت حد فيكم يوم من الأيام..ويارب يشفيكم من كل مرض ويحفظكم من كل سوء ويخليكم ليا يارب

Thursday, November 1, 2007

صـــــــــــــــــــــدمه..إنا لله وإنا إليه راجعون

إنا لله وإنا إليه راجعون


قريت خبر صدمه دالوقتى ومش قادره أصدقة أن الأنسانه اللى عرفتها من المدونات وحبتها أوى زى ما كل الناس حبيتها توفيت إلى رحمه الله تعالى صاحبة بلوج بهلوله واللى قال الخبر زوجها صاحب بلوج بهلول

بجد مش عارفه أقول إيه ولا أتكلم صدمه كبيره أوى عمرى ما تخيلتها أبدا.. الدموع سابقه الكلام كلى برتجف والكلام مش قادر يقول حاجه مش قادر أعبر عن الحزن اللى جوايا أبدا كأنى كنت أعرفها من زمان وكل اللى عرفها بيحبها الكلام مش هيديها حقها كنت بفرح أوى لما بقرى تعليقاتها اللى كلها روح مرحه كانت أنسانه كلها ضحكه جميله من أنسانه أجمل منها ... آسفه بجد مش قادره أتكلم الدنيا دى صغيره جداجداجدا

أسألكم أسألكم أسألكم أسألكم الدعاء لها

اللهم أغفر لها و ارحمها و اعفو عنها و أكرمها
اللهم وسع مدخلها و ادخلها الجنة وأ غسلها بالثلج و الماء والبرد
اللهم يمن كتابها و هون حسابها و لين ترابها و ثبت أقدامها و ألهمها حسن الجواب

اللهم طيب ثراها و اكرم مثواها واجعل الجنة مستقرها و مأواها

اللهم نور مرقدها و عطر مشهدها و طيب مضجعها

اللهم آنس وحشتها و ارحم غربتها و قها عذاب القبر و عذاب النار

اللهم نقها من خطاياها كما ينقى الثوب الأبيض من الدنس

اللهم فسح لها في قبرها و اجعلها روضة من رياض الجنة و لا تجعله حفرة من حفر النار

اللهم انقلها من ضيق اللحود و القبور إلى سعة الدور و القصور مع الذين أنعمت عليهم من الصديقين و الصالحين والشهداء

اللهم اجعل لها من فوقها و من تحتها و من أمامها و من خلفها و عن يمينها و عن يسارها نورا من نورك يا نور السماوات و الأرض
اللهم أبدلها دارا خيرا من دارها و أهلا خيرا من أهلها واسكنها فسيح جناتك في الدراجات العلي آمين

اللهم إن كانت قد أحسنت فزد في إحسانتها و إن كان قد أساءت فتجاوز عن إساءتها

يا أكرم من سئل و يا أوسع من جاد بالعطايا … خفف أحمالها و حط من أوزارها واجعلها في مقام من قام لك بالقرآن أناء الليل و أطراف النهار

اللهم كن لها بعد الحبيب حبيبا و لدعاء من دعا له سامعا و مجيبا و اجعل لها من فضلك و رحمتك و جنتك حظا و نصيبا


اللهم من أحييته منا فأحييه على الإيمان و من توفيته منا فتوفه على الإسلام

اللهم إنا نسألك توبة قبل الموت و راحة عند الموت و مغفرة بعد الموت

اللهم اجعل لنا عملا يؤنسنا في قبرنا إذا أوحشنا المكان و لفظتنا الأوطان و فارقنا الأهل و الجيران

اللهم هب لنا نفوسا مطمئنة تؤمن بلقائك و ترضى بقضائك تقنع بعطائك

اللهم أغفر لحيينا و ميتنا و شاهدنا و غائبنا و صغيرينا و كبيرنا و جميع موتى المسلمين و المسلمات الذين شهدوا لك بالوحدانية و لنبيك بالرسالة و ماتوا على ذلك

اللهم اجعل خير أعمالنا خواتيمها و اجعل خير أيامنا يوم لقائك

سبحان ربك رب العزة عما يصفون و سلام على المرسلين و الحمد لله رب العالمين

ياريت عندى طلب صغير نعمله كلنا ...عايزين نختم القرأن لروحها وكل واحد يحدد أجزاء هيقراها أنا هقرى أن شاء الله الجزء الأول والتانى