لما نقرب أوى من بعض

كلمات أغنيه عجبتنى أوى أوى أوى لفيلم أحلام عمرنا وهى فعلا أحلام عمرنا وأكيد أى حد هيحسها أكيد هيحبها ولا إيه رأيكم ؟؟؟لأن كلامها بجد حقيقى أوى وجميل وواقعى وأثر فيه من جوايه أوى لمس حاجه من جوه حبيت كل الناس تقراها علشان كلنا نحسها

لما نقرب قوى من بعض وأما بجد نخاف على بعض ......ممكن نعلى حقيقى ونقوى ونصبح أقوى شعوب الأرض

لما بايدنا نأكل روحنا... لما نفوق ونداوى جروحنا ..واما أنا تتحول أحنا ...ونصلح أخطاءنا بجد... ممكن نعلى حقيقى ونقوى ونصبح أقوى شعوب الارض ونصبح أقوى شعوب الأرض

لما نحب بجد عملنا ..وأما نقول احنا اللى عملنا..ولما نلاقى فى بكرة آمالنا ..ولما نبطل خوف من بعض. لما نعمر أرض بلادنا

لما نعلم صح ولادنا... لما يعود من تانى بلادنا... لما نصدق كلمة بعض... ممكن نعلى حقيقى ونقوى ونصبح أقوى شعوب الارض ونصبح أقوى شعوب الارض

لما نقرب قوى من بعض وأما بجد نخاف على بعض ممكن نعلى حقيقى ونقوى ونصبح أقوى شعوب الارض

فى الأخر يارب نقدر نكون كده كلنا ونكون أيد واحده وأحنا هنبقى أحسن وأقوى شعوب الأرض أن شاء الله ويارب يبلغنا ليله القدر وأمانه الدعاء وكل رمضان والكل بألف خير ويارب نعتق كلنا من النار ويرزقنا الفردوس الأعلى يارب

"يوم فى الجنه"

السلام عليكم

كل سنه والكل بخير ..يارب يكون رمضان جميل وكله عباده وفرحه وحاجات جميله على الكل يارب

أنا كتبت البوست ده مخصوص لأنى بجد مبسوطه وفرحانه أوى من أمبارح بطريقه محدش يتخيلها حاسه أنى هطير من السعاده..أنا كنت مش هكتب فى رمضان حاجه لأنى مشغوله بس بجد من كتر فرحتى عايزه الكل يفرح زى

طبعا الكل بيسأل أيه الفرحه الغريبه دى وإيه العنوان ده "يوم فى الجنه "بس بجد فعلا أمبارح كان يوم فى الجنه كأن الجنه على الدنيا أنا كنت قولت ليكم على الأسره الخيريه اللى عاملها أنا وصحابى أحنا دايما بنعمل أفطارات جماعيه مع أطفال الجنه أمبارح بقى كنا عاملين أفطار جماعى مع "أطفال الجنه" واللى ميعرفش مين أطفال الجنه هقول هما مين مع أنى بحب أسم أطفال الجنه أكتر وعمرنا ما بنقول عليهم غير أطفال الجنه اللى هما الأطفال الأيتام والمعاقين والمكفوفين ومرضى السرطان ... الحمد لله كنا أمبارح منظمين أفطار جماعى يضم 420 طفل من أطفال الجنه وبجد يا جماعه كان يوم مش قارده أوصفه كلنا كنا بنطير من السعاده مع الكل التعب اللى أحنا كنا فيه فى التنظيم وفرحتنا وأحنا بنكيس الهدايا و أننا نلعب الأطفال فى الملاهى والتنظيم ساعه الفطار وبعد الأفطار نودى بقيه الأكل مستشفى السرطان بس كان قلبنا بيرفرف من جوانا كل واحد فينا كان مش عارف يعمل إيه ولا إيه ومع أننا كلنا تقريبا ما فطرناش خالص لحد ما رجعنا بيوتنا علشان كنا مشغولين فى مليون حاجه بس من كتر الفرحه علشان الأطفال فرحانين مكناش حاسين ولا جوع ولا عطش ولا أى حاجه مش حاسين الا بوجوه بريئه بتضحك وسعيده وعيون أطفال فرحانه ..

وخصوصا ساعه ما كرمنا الأطفال الأيتام والمكفوفين المتفوقين علشان نقول ليهم أن بكره أحسن وأن محدش أحسن منهم حتى لو كان دكتور جامعه يتكرموا زيهم زى أى حد ...تعرفوا كلنا عيطنا ساعتها علشان سعاده طفل لما 600 واحد بيسقف ليه بيقوله برافو بيخليه يشوف بكره أحسن ويشوف حلمه الجميل لبكره

يا جماعه الأحلام مش مستحيله الأسره اللى أنا فيها أنا وصحابى والله كنا كلنا 3 بس فى الأول وكان حلمنا على قدنا دالوقتى الحمد لله عملنا كل حاجه كنا بنحلم بيها واللى أكتر كمان من حلمنا شنط الخير الشهريه ودفع مصاريف وتجهيز عرائس أيتام وأفطارات وعملنا أوض لعب للأطفال فى المستشفيات وأيام وأيام فى الجنه وحاجات كتير بفضل ربنا الحمد لله وإن شاء الله هنبدأ فى تنظيم هدوم العيد والعيديات ولاوازم المدرسه ل 1000 طفل من أطفال الجنه أدعولنا نقدر نعمل عملنا على أحسن وجه.. وهما حبه صبر حبه حماس يبقى الحلم صوره وصوت

أنا ما كتبتش البوست ده علشان أٌقول أحنا بنعمل حاجه لا علشان أقول لكل الناس الخير من أحسن الحاجات اللى فى الدنيا دعوه للخير

يا جماعه أنا عايزه كل واحد فينا اللى جرب يعمل خير يكمل ويحلم ويحلم وهيقدر واللى مجربش يجرب يعمل خير صدقونى هيلاقى سعاده عمره فى حياته ما يتخيل أنه هيبقى مبسوط أكتر من كده لما يشوف طفل مبسوط أو بيقوله يا ماما وبابا جربوا وأنتو مش هتقدروا تتنازلوا عن الفرحه الكبيره جدا دى هتبقى كل حته فيكم فرحانه حتى لو كان جسمكم مفيهوش حته الا تعبانه بس الفرحه بتنسى كل حاجه

رمضان والسنه كلها مش بس عباده ..الخير لازم يكون جوانا كلنا كل ثانيه محسوبه من عمرنا عند ربنا والخير مش فلوس الخير مجرد انك حتى تتعب بمجهودك وقتك هو أهم حاجه تقدر تعمل بيها خير
وفى الأخر عايزه أقول لكل صحابى وأخواتى اللى شاركونى يوم فى الجنه يوم كان أجمل وأجمل وأحنا مع بعض لان أيد لوحدها ما تصقفش وأيد على أيد تشيل وطول ما الايد فى الايد هنفضل نحلم مش هنخاف حتى لو عايزين الشمس هنطولها ان شاء الله وهنحقق أحلامنا طول ما ربنا دايما معانا واللى هما كتيرجداجدا دول بس حبه صغيره جدا جدا منهم بس هقول اللى منهم مدونين

أولا اللى كان مسئول عن التنيظم العام لليوم أخويا فى الخير ملتقى المجانين

أخويا فى الخير الفدائى ههههه اللى كان بيلعب الأطفال فى الملاهى أنين العروبه

حبيبتى وأوحى عاشقه الوطن

سوكتى الجميله وأوحى برضه الدنيا ريشه فى هوا

وأخويا فى الخيرالحاضر معنا مع أنه غايب عننا الملاح التائه

وأخويا فى الخير بنلف فى دواير

يا شباب الخير بحبكم أوى وربنا يخليكوا ليه يا أحلى أصحاب وأخوات فى الدنيا ..وجمعنا ولمتنا فى الخير من أجمل الأوقات فى حياتى أنتو من أغلى الحاجات اللى حصلت ليه فى حياتى

حياتى قلبكم مكنتش حياه

ويارب دايما جمعنا ما تفرقناش

ويارب يرزقنا دايما الأخلاص فى القول والعمل ويجعله فى ميزان حسناتنا ويرزقنا الجنه يارب العالمين

سأعبدك يارب كما لم أعبدك من قبل

رمضان كريم

هييييييييييييييييييييييه هييييييييييييييييييييه رمضان جه والفوانيس أتنورت والقلوب كلها لربنا أتفتحت والناس أتجمعت ومصر الجميله بخير والجوامع أزدحمت مع أن المفروض على طول

أجمل شهر فى السنه هل علينا بخيره وجماله وروحنياته بجد من قبل رمضان بكام يوم وأنا حاسه براحه من جوايه كبيره جداوفرحه كبيره جدا من جوايه أيوه كل سنه بفرح بس السنه دى فرحه كبيره أوى حاسه أن رمضان عيد من قبل ما يبدأ يارب يكون شهر خير وعباده على الجميع يارب وكلنا نقرب من ربنا أكتر وأكتروأدعولى كلكم أقرب من ربنا أكتر وأكتر ومش هتكلم عن أفضال الشهر الكريم ناس أحسن منى كتيره أتكلمت عنها وأكيد كلنا عارفنها بس أهم حاجه نصوم كلنا بجد مش صيام بطن وخلاص كل حاجه فينا تصوم العين والسمع والكلام وكل حاجه ونقدر نصوم رمضان أيمانا وأحتسابا يااااارب وعايزين كلنا نقول

"سأعبدك يارب كما لم أعبدك من قبل"

معلش أعزرونى كلكم عن أنشغالى الشهر ده ويارب يتقبل منا ومنكم صالح الأعمال وعايزه أدعوكم كلكم مش بس للصيام والقيام وقراءه القرآن
بس كمان عايزين كلنا نعمل خير حتى لو بأقل حاجه عندنا نفطر صايم نرسم بسمه على وجه يتيم وشنط رمضان ونسعد أطفال السرطان فيه حاجات كتير نعمل فيها خير

وبجد يا جماعه عمل الخير بيدى روح تانيه لكل واحد وبيداوى الروح والقلب من جوه غير جزاء ربنا تقدروا تداوا أى حاجه بعمل الخير والصدقه ..أنا الحمد لله بقالى أكتر من 3 سنين بشتغل أنا وصحابى وعاملين أسره خيريه صغيره فى الكليه وأول ما بدأنا العمل الخيرى مكنش معانا أى ماديات نبدأ بيها ومكنش عندنا أمل بس الحمد لله وسبحان الله مصر لسه كلها خير علشان كنا عايزين نعمل حاجه بجد بجد والله والله ربنا دايما كان فى الأنتظار وقدرنا الحمد لله نعمل حاجات كتيره جدا بفضل ربنا أفطارات لايتام وأطفال السرطان وشنط رمضان وحاجات كتيره جدا على مر السنه وكل ده بفضل ربنا

يلا يا جماعه عايزين كلنا نعمل خير وكل واحد يبدأ حتى لو بحاجه صغيره وصدقونى والله هتلاقى خير مش هتتوقعوا وربنا دايما هيكون فى الأنتظار
للمره التانيه كل الناس تعزرنى لو أنشغلت علشان غير أن كلنا مشغولين فى العباده والمطبخ بقى والمواعين ههههه كمان شغل الأسره الخيريه ورانا شغل كتير جدا فى رمضان بسبب خير الناس الكبير دايما وأدعولنا بجد نقدر نعمل كل اللى بنحلم بيه ونسعد ناس على قد ما نقدر بس أكيد لو حصل حاجه تستاهل أكتبها وأحكيها من هتأخر
وأن شاء الله هبقى أحكيلكم عن باقى وكل التجربه بتاعت الأسره الخيريه دى علشان بجد حياتى قبلها مكنتش حياه ودى الكلمه اللى بقولها على طول
يلا كلنا نعمل خير
وكل سنه والكل بألف خير يارب
وكل عام وأنتم إلى الله أقرب ولطاعته أدوم

تقبل الله منا ومنكم صالح الأعمال

بلدنا أمانه فى أيدينا

السلام عليكم

أولا أزيكم كلكم يارب تكونوا كويسين وكل سنه والكل بخير لأن شهر الخير قرب خلاص وربنا يهدينا يارب وكلنا نرفع شعار سأعبدك ياربى كمان لم أعبدك من قبل

أنا عايزه أقولكم أن انا من يوم ما كتبت أخر بوست وأنا عامله أفكر هكتب أيه المره الجايه لآنى لسه جديده فى عالم التدوين ومعنديش موهبه أوى قعدت أفكر كتير وكنت عايزه أكتب على حاجه غاليه علينا علشان ندعلها فى رمضان

حاجه تعتبر أمنا كلنا ولقيت اللى مش ممكن يختلف على حبها " مصر اللى هى أغلى أسم وجود وأسم مخلوق للخلود

"أنا مش عامله البوست ده علشان أكتب فى السياسه مش علشان خايفه لا سمح الله لأنى مش بخاف الأ من ربنا بس يمكن فى بلوجات كتير وأحسن منى أتكلمت فى السياسه كتير جدا

أنا كنت عايزه أكتب بوست فى حب مصر اللى الكل دالوقتى مش فاكر ألا عيوبنا .. مع أن مصر مالهاش دخل أنها وصلت لكده العيب مش فى مصر العيب فينا أحنا

ساعات بقعد أفكر أقول ليه أشمعنه مصر اللى بيجرى ليها كده لقيت أننا برضه أكيد مقصرين فى حق مصر معرفش كل واحد وجه تقصيره أيه بس اللى أكيد أننا مقصرين فى حقها

لو كل واحد أشتغل بجد بذمه وأدى عمله حقه مكناش وصلنا لكده حتى لو كان فيه نظام بيوصلنا لكده بس أتقان العمل دى حاجه من طبع الآنسان ومن دين الأنسان وحاجه فى كل الأديان

أنا مش هعيش على ذكريات الماضى وأقعد أقول الفراعنه والكلام اللى مودينا فى داهيه ده أننا عايشين على زكريات الماضى أنما بنعمل ايه دالوقتى ؟؟؟؟؟؟

لو كل واحد عمل اللى عليه هنقدر نعمل حاجه لمصر والله هنقدر نعمل ولو حاجه صغيره لان مصر أمانه فى أيدينا أحنا

معرفش ليه كل ما أسمع أغنيه عن مصر أو كلام عن مصر أعيط بجد بتصعب عليه مصر أوى يمكن علشان أنا مجربه الغربه 10 سنين أيوه كنت صغيره بس بجد أحساس تانى وانا فى مصر كل نفس فيه بيحس بامان فى مصر

ليه يا جماعه معدناش بنفتكر لمصر ألا البطاله الا الفساد الا ... الا .... الخ دى حاجه مش عيب فى مصر.. مصر كبلد الناس الطيبين الناس اللى عمرى فى حياتى ما شوفت وشوش طيبه زى وش المصرى .. الراجل المصرى الجدع اللى مفيش زيه والله فى الدنيا كلها حتى بسمراه بكل حاجه فيه بأخلاقه الجدعنه الشهامه ..البنت المصريه اللى بجد الجدعه اللى ساعه الجد بميه راجل..مصر اللى فيها المسيحى زى المسلم فيها وتلاقيهم يخافوا على بعض زى الأخوات بجد..الشوارع اللى بتحس بالحياه فيها الناس اللى ساعه الفرح أيد واحده وساعه الحزن برضه أيد واحده

بحس أن مصر هى أرض المحبه والله وأتحدى أى واحد ما يقولش أن مصر هى روحه من غير شعارات ولا كلام فراغ

أنا عن نفسى بقعد أقول لماما ياااه بقى أنا عايزه أسافر أنا أتخنقت من الزباله من عدم تقدير الموهبه من عدم التقدير لكل حاجه من ومن ومن من كل حاجه الناس مخنوقه منها وماما تقعد تقولى للدرجه دى أحساسك تبلد بمصر وتقولى على تاريخ مصر وأقولها بلا دوشه بس والله والله كله كلام عيال كلنا عيال فى كلامنا بس لما بحس أنى ممكن أبعد عن مصر ببقى عامله زى الطفله اللى بتوه عن ماماتها

بجد يا جماعه بتوجع أوى لما بحس ان بقى فيه مصرين عنده جفا فى حب مصر .. من كام يوم أِشتلغت أغنيه ما شربتش من نيلها بتاعت شرين أول ما قالت ما شربتش من نيلها والله كل اللى كان قاعد قالوا طفحنا من نيلها يااااه ليه وصلنا لكده مصر مش وحشه أوى كده وذنبها أيه هى أن العيب فى كل واحد فينا اللى بيقصر فى عمله

والله مصر دى الحضن الدافىء ومحدش هيحس أوى بالكلمه دى ألا لو أتغرب هيشوف أحلى منها كتير بس مش هيحس بحب ألا لمصر مش علشان هى أحلى بلد فى الدنيا بس علشان أمنا زى ما أحنا بنحب مامتنا مش علشان أحلى واحده فى الدنيا بس علشان أمنا

بجد مش كلام أغانى جربت فى عز ما تحزن تمشى فى شوارعها وتشكى ليها حتى لو أوسخ شوارع فى الدنيا يا جماعه دورا جواكم هتلاقوا هى الصحبه وهى الآهل هى كل حاجه من جوانا هى كل ذكرياتنا حتى لو كانت ذكريات وحشه

والله يا جماعه مدام بنحب بلدنا يبقى هتتغير بأيدينا..أحنا اللى نعليها بأيدينا نخليها أجمل لينا وللأولادنا

ومصر دايما يفوت عليها المحن ويفوت عليها الزمان وهى أغلى وطن وهى أعلى مكان حتى لو بقت أفقر بلد فى الدنيا

ياريت لما حد يعيب فى حاجه ما يعبش فى مصر يعيب فى اللى وصلوا مصر لكده وأولهم كل واحد فينا ومحدش ينكر أن كل واحد مقصر بدليل أن أول حاجه بتجى بتفكرنا من زهقنا نسيب مصر ونطفش مش هو ده الحل أيوه ده ساعات بيبقى واقع علينا بس مفيش حد يقولى أنه معدش عنده أحساس بمصر

مش هتلاقوا مثالها دى ست كل عصر

يااااه بجد نفسى أحقق حياة أحلامى اللى بحلمها لمصر نفسى أوى أوى بس مش هنعرف نعمل حاجه لمصر الا لما يكون حبنا ليها هو بعد حبنا لربنا ودينا واهلنا

يا جماعه كفايه آيات فى القرآن عن مصر أعتقد أن مفيش بلد ذكرت فى القرآن أكتر من مصر

فَلَمَّا دَخَلُواْ عَلَى يُوسُفَ آوَى إِلَيْهِ أَبَوَيْهِ وَقَالَ ادْخُلُواْ مِصْرَ إِن شَاء اللّهُ آمِنِينَ (يوسف 99 )
صدق الله العظيم

أما عن رسول الله صلى الله عليه و سلم فى ذكر مصر
قوله صلى الله عليه و سلم (ستفتح عليكم بعدى مصر فاستوصوا بقبطها خيرا فإن لكم منهم ذمه و رحما ) رواه مسلم.
و قوله صلى الله عليه و سلم (إذا فتح الله عليكم مصر فاتخذوا بها جندا كثيفا فذلك الجند خير اجناد الأرض ، قال أبو بكر لم يا رسول الله؟ قال لأنهم و أزواجهم فى رباط إلى يوم القيامة

صدق رسول الله صلى الله عليه وسلم

مش قادره أقول كلام تانى أحلى من كده

غير بحبك يا مصر مهما قالوا ومهما عملوا

عارفه ان فيه ناس مش هيعجبها البوست وهتقول أهو كلام والله أنا عارفه كل مشاكل الحياه فى مصر لأنى عايشه فيها أنا مش بتكلم عن مشاكل أنا بتكلم عن حب مصر وبس

بس مصر هى الوطن للى يعرف معنى الوطن

ياااارب يكون كلامى خفيف عليكم وكل سنه وأنتو بألف خير

أنت بعد الأهل أهلى

أولا عايزه أقول بجد شكرا لكل الناس اللى علقت عندى واللى فرحت جدا بكلامهم ومكنتش متخيله كده واللى أدونى بجد دفعه ونشاط أنى أكتب ويارب أكون عند حسن ظنهم يااارب

أنت بعد الأهل أهلى

أدى يدى مد يدك

أنت بعد الأهل أهلى وأذا يوم قلبك نهدلى هتلاقينى بقلبى عندك

يا صديق عمرى وأحلامى وعذابى

فى ليالى فرحتك عامل حسابى

فى ليالى وحدتك بتدق بابى

فى ليالى وحدتى بتدق بابى

وعمر باب قلبى ما صدك

يا صديقى مد يدك أدى يدى مد يدك

أنت بعد الأهل أهلى يا صديقى مد يدك

أصدقاء والود موصول فوق ظروفنا مهما نبعد مهما طفنا مهما شوفنا

فى ساعات شدتنا وقلقنا وخوفنا تستعدنى وأستردك

أنا حبيت أبدأ بالكلمات دى علشان أنا بحب الكلمات دى جدا بجد وقد أيه معبره عن كلام كتير عايزه أقوله لأغلى حاجه عندى فى الدنيا بعد ربنا ودينى وأهلى طبعا وهى من أغلى الحاجات فى الزمن ده ومن الحاجات النادره جدا وهى الصداقه الصداقه الحقيقه اللى بيبقى فيها أصدقاء يعنى صديق وصديق يعنى

ص=> الصدق

د=> دم واحد

ي=> يد واحده

ق=> قلب واحد

هو ده المعنى الحقيقى للصداقه اللى شايف أنه كده مع صديق يبقى هو ليه صديق وصاحب بجد مش صداقه الزمن ده صداقه التاك أوى زى كل حاجه فى حياتنا مجرد مصالح وتخلص

لا الصداقه الحقيقه اللى عمر ما حاجه تأثر فيها ولا الزمن ولا البعد ولا أى حاجه حتى لو كل واحد فى بلد .. الصداقه الحقيقه اللى بتخليك تحس بصديقك هو متضايق او فرحان حتى وأنت مش معاه أو ما بتكلموش اللى تخليك تفرح لفرحه وتزعل لزعله اللى تخليكم دمكم زى بعض اللى تخليكم قلب واحد هو ده الصديق علشان كده دايما يقولوا لاى حد بيحب حد خليها صحبتك قبل ما تكون حبيبتك علشان الصداقه دى أغلى من كل حاجه وأى حاجه

أنا عن نفسى الصداقه هى كل حاجه فى حياتى .. أنا ليه صديقه عمرى اللى تعتبر حياتى هى اللى ضحكتها بتضحكنى ودمعتها بتبكينى.. أغلى حاجه عندى أحنا من زمان جد من أعدادى وأحنا مع بعضا وأحنا بينا أرتباط عمر ما أى حاجه أثرت عليه كنا 24 ساعه مع بعض بنحس ببعض من غير كلام والله لما كان يفوت يوم واحد وما أكلماش كنت بحس أن اليوم مالوش طعم مع أننا ولا كنا فى كليه واحده ولا حاجه يعنى أختلاف الكليات ما خلتناش نبعد عن بعض

كنا لما نزعل من بعض ما بنعرفش بجد نفرح بأى حاجه وأحنا مش مع بعض لو حد فينا زعلان التانى على طول معاه علشان كده الصداقه الحقيقه مفيش حاجه تغيرها

يعنى كان أكبر تحدى كل الناس أتحدتنى فيه وقالوا مجرد ما حد فيكم يتخطب أو يتجوز خلاص الأيام هتبعده مجرد أنه لقى حبه الأعظم ما يعرفوش أن حب الصداقه ده حاجه تانيه .. وجه التحدى اللى الحمد لله قولت للناس كلها أن عمر الجواز والخطوبه ما هتبعدنا وصديقه عمرى وصحبتى أتخطبت ومفيش حاجه فرقت بينها وصحبتى أتجوزت وأتجوزت أنسان حقيقى ما فكرش أن حبه ليها وحبها ليه لازم يبعدها عنى وفعلا انا بشكره وبحترمه على حاجه زى دى والحمد لله مفيش حاجه فرقت بينا أيوه لازم تكون مشغوله شويه بس أنا فرحانه على فرحها وأنها مشغوله فى حاجه مبسوطه فيها ومع ذلك زى ما أحنا بنحس ببعض من غير كلام ولازم على طول نشوف بعض والود موصول فوق زمانا وحياتنا علشان ده وعد بينى وبينها أن نفضل مع بعض وفعلا أول ما صحبتى أتجوزت لما كانت مشغوله شويه كنت بمر بأكتر فتره وحده وزعل فى حياتى علشان بعدها بس من جوايه كان أكتر وقت كنت فرحانه بيه علشان هى فى أسعد أوقاتها وفى أجمل حياه مع الأنسان اللى بتحبه وبتعيش حياة الأحلام اللى كنا بنحلم بيها وبتمنى أن ربنا يسعدها أكتر وأكتر والحمد لله ورينا للناس أن مفيش حاجه تفرق بينا أبدا

وعايزه أقولها يوم ما بتغيبى عليه شويه بتبقى أوحش أوقات حياتى يا صديقه عمرى يا أجمل حاجه فى حياتى يا أميره عمرى ياأجمل أميره اللى شوفته فى عمرى حاجه وأنتى حاجه القى زيك فين دى حاجه مستحيله هى اللى أتقال عنها الكلام ده "اللى قالت الكلام ده خالة صحبتى بس من أجمل الحاجات اللى ممكن توصفها توصف أغلى ما ليه بحبك وهحبك وهفضل أحبك مهما حصل وربنا يخليكى ليه وأشوفك أسعد وأحلى وأجمل واحده فى الدنيا يا أيمان "

فالكى أبتسامه توصى بالسعاده لكل البشر

كعروس فاز بها فارس دعت له أمه بيكى فأستجاب لها القدر

فأنتى فى قلبى ملاك تجنب ذنوب البشر أهداه الله جمال الروح فما بخل

يلا يا جماعه كل واحد يشوف مين صديقه الحقيقى مين اللى بجد يستحق كلمه صديق مين اللى يستحق الصداقه ولو ليك صديق بجد أوعى تفرط فيه أوع تغيب عنه أوعى تزعله أوعوا حاجه تفرق بينكم وأتحدوا الزمن والناس بصداقتكم دى

خلوا أيديكم فى أيدين بعض لآن أجمل أوقات حياتك هى اللى بتقضيها هى مع صديقك لأن حب الصديق ده من أغلى الحاجات فى الدنيا ومش هتلاقى حد جنبك زيه مهما كانت الظررف لأنه بعد الأهل أهلك ولانكم مش هتلاقوا ضحكه بجد الا فى وسط أصحابكم وصدق فى كلامك ألا معاهم لآنهم المرايه لكل واحد فينا

ودى كلمات رائعه تانيه لازم كلنا نفكر فيها ونحسها

أدى أيدى مد أيدك جرحى جرحك عيدى عيدك ود دافىء نبع صافى شىء كأنه نيل موافى بين وريدى وبين وريدك

يا صديقى مد أيدك

يا صديق عمرى يا صاحب زكرياتى أنت كنزى وتحويشه حياتى ومرياتى اللى بشوف جواها ذاتى وتواجهنى بعيبى تكشف سيئاتى

تقسى بحنان واستزيدك يا صديقى مد أيدك
أصدقاء والود موصول فوق زمانا بيه أمنا وليه أمنا وفيه أملنا بيه على الدنيا وعلى الدهر أستعنا وأن زمنا خانا وفى لحظه طعنا أستعدنى وأستعديك يا صديقى مد أيدك

يلا يا جماعه أللى مزعل صاحبه اللى الحياه خدته من صاحبه يقوم يكلمه واللى مزعله يصالحه مش هتلاقى صديق تانى بسهوله

يارب يكون كلامى عجبكم وحستوه قبل ما تقروه

ويارب أحقق حياة أحلامى مع صديقتى ونتحدى العالم كله ونفضل صحاب لحد ما أحفادنا يبقوا صحاب ونجوز ولادنا لبعض لآن الوقت اللى أحنا فيه مع بعض عمر ما حاجه هتخلينا ننساه