أخيرا هالبس تاج ..تاجى يا تاجى

أولا أعزرونى لو كنت أتأخرت فى التعليق عند أى حد على بوسته الجديد وده لأنى كان بقالى 5 أيام عند أختى يعنى كنت بغير جو شويه وقردت شويه مع ولاد اختى وطلعوا عليه القديم والجديد ولسه راجعه النهارده ويارب يكون الكل بخير أن شاء الله

وأحتكم الأمر وأخيرا هالبس التاج الى أتمرر ليه من مدونه تنفيس ل أبو صلاح ومن مدونه رحيق الحب ومن بنات أفكارى ومن كذا حد من زمان من أول رمضان وكل شويه أقول أكمله وأنسى الزهايمر من بدرى عندى بس الحمد لله ربنا سهلهالى وخلصته

لو قالولك اختار عصر من عصور مصرعلشان تعيش فيه تختار اى عصر و فى عهد اى حاكم؟؟

هختار عصر الرسول صلى الله عليه وسلم أو عصور الخلافه الأسلاميه علشان كل حاجه أيامها كانت حلوه العدل بين الناس والعدل فى كل حاجه وكان كل واحد عارف وظيفته الراجل فى وظفيته الصح والمرأه فى وظيفتها الصح علشان كده كان حال الدنيا مش متلخبط وكمان كان التدين بأخلاص أوى أيامها علشان كده كان كل العصر ده أنتصارات

..
اول اولويه فى حياتك عيلتك ولا شغلك ولا اصحابك؟

عيلتى وبعدين صحابى أما الشغل مالوش أى أولويه ومش مقتنعه بشغل المرأه شايفه أن شغلها فى بيتها وأنها تراعى جوزها وأولادها هو ده الشغل اللى هتزاحم بيه الرسول على باب الجنه ..يعنى الشغل للمرأه فى الضروره أوى

ايه اكتر حاجه بتحبها فى رمضان؟

روح رمضان الجميله تحس ان الدنيا من جوه كل واحد صافيه كده وريحه رمضان محدش يستغرب والله أنا بشم ريحه لرمضان وكمان ان الناس بتقرب من ربنا أوى وصله الرحم والجوامع المليانه وصلاه الفجر اللى الجامع مليان فيها ونفسى نبقى كده على طول وطبعا التراويح واللمه على الفطار وصوت الراجل اللى بيقول مدددددددددددفع الافطااااار أضرب

اوصف ليا اجمل فطار ممكن تفطره؟؟

أولا يكون مع ناس بحبهم ومش مهم إيه الأكل حتى لو فول وطعميه

مش عارفه عادى يعنى مش بتفرق الأكل أوى هو الخشاف بحبه جداجدا ويا سلااااااااام بقى لو محشى ورق عنب نقطه ضعفى وأى أكل تانى بحبه لانى بتعب ماما أوى لأن حاجات كتيره فى الأكل والشرب ما بحبهاش

لو انت حاكم على مجموعه من الافراد هتكون عادل؟؟ طب هتعمل ايه عشان تتأكد انك حاكم عادل؟

أكيد هحاول أكون عادل لان الظلم حاجه وحشه جدا وكلنا حاسين بيها .. وعمر ما حد طبيعى هيحس بالسعاده وهو ظالم ولا هيستريح "حكمت فعدلت فنمت " وكفايه دعوه المظلوم

وهعمل أيه علشان أتأكد هنزل عادى فى الشارع من غير حراس وأشوف رد فعل الناس وكمان هحاسب نفسى أشوف كل يوم كان مفروض أعمل أيه وعملت أيه يوم بيوم

اللى بيبوظ الحكام .. نفسهم؟ ولا الشعب؟ ولا الحاشيه المقربه؟

التلاته مع بعض ..أكيد النفس السيئه أهم حاجه فى أنها تبوظ حد وتبعده عن ربنا والشعب أنه يسكت "حتى يغيروا ما بأنفسهم" وكمان الحاشيه لأن الزن على الودان وكمان المرء على دين خليله

مين أكتر اعلامي مصري بتحترمه؟

حمدى قنديل-منى الشاذلى

قريت ديوان عمر مصطفى صاحب بلوج تجربه " اسباب وجيهه للفرح" عن دار ملامح و لا لسه ؟؟ لو اه ايه رايك فيه؟؟
لا ما قريتوش ياريت كان اللينك محطوط

لو ممكن تشتغل شغلانه تانيه غير اللى انت بتشتغلها او كنت بتشتغلها كنت تتمنى تبقى ايه؟

هشتغل أيه غير عاطله هو فيه شغلانه أحسن من عاطله ومش عايزه أشغل بس أنا كان نفسى أبقى مهندسه كمبيوتر وجرافيك والحاجات دى أيام ما كان حلمى أدخل هندسه بس أمتحاناتنا كانت كبيسه أيامها وكمان بحب أوى التصوير والديكور وكان نفسى أدخل فنون جميله ونجحت فى الأمتحانات وفى الأخر بابا قال لا وزمان وأنا صغيره مضيفه بس بشرط على طيران الأمارات لان فى مصرمفيش محجبات للآسف

ايه تانى بلد تتمنى تعيش فيها بعد مصر؟

مصر هى أمى طبعا بس ما يحصلش حاجه لما أروح أقعد شويه فى الأمارات علشان بجد البلد بنت نفسها من أول وجديد وهتوصل زى أوروبا وأكتر وبحب أوى الشيخ زايد ونعم الحاكم اللى بنى بلده ومن بعده الشيخ محمد بن راشد حاكم دبىوبصراحه هى بلد نظيفه وبتقدر القدرات..وبعدها ممكن فرنسا وهكذا بقى ألف الدنيا

اوصف ليا ترتيبات اجمل فرح ممكن تحضره؟

فرح بسيط يكون باين الحب أوى فى عيون العريس والعروسه والفرحه الحقيقه مش المجامله من اللى حواليهم ..أما عن نفسى انا مش عايزه أعمل فرح لأنى عايزه أبدأ حياتى الجايه صح ونفسى بجد فلوس الفرح نجوز بيها ناس فقرا

والفرح اللى ممكن أعمله يكون أوت دور يعنى مكان مفتوح جنينه مثلا والزينه تكون أبيض وورد كتير أوى و يكون فى نور ربنا يعنى الساعه 4 وموسيقى رومانسيه كده ومعايه كل الناس اللى بحبهم

بتراعي كلام الناس والقيل والقال؟ لو اه او لو لا قول لى ليه؟
الناس الناس الناس مشكله والله أصل الناس فيها طبع غريب لازم تتكلم وخلاص سواء بقى صح ولا غلط ومهما حد عملت مش هتعرف ترضى كل الناس .. بس أكيد كلام الناس مهم برضه فى حاجات علشان تعرف أنت ماشى صح ولا غلط

صحيت من النوم ما لقيتش الموبايل ولا الكمبيوتر ولا الكاميرا الديجيتال ولقيتنا رجعنا لعصر الحمام الزاجل والحصنه هتكون سعيد؟

أه هبقى سعيده جدا بصراحه مع أن الحاجات دى مهمه أوى عندى بس هبقى سعيده لآنى بحس أن كل ما التكنولوجيا بتكتر الناس بتبعد عن بعض
يعنى مثلا لما النور بيقطع تلاقى البيت كله قاعد فى حته واحده مع بعض وبنتكلم ولما النور يجى تلاقى اللى على الكمبيوتر واللى تليفزيون واللى تليفون كل واحد فى حته

السعاده هى؟
الرضا عن النفس والرضا عن النفس مش هيجى ألا برضى ربنا سبحانه وتعالى يعنى والله والله أكتر لحظات حياتى لما بحس أنى قريبه من ربنا أكتروأشوف السعاده فى عيون اللى حواليه وكمان لما أحقق حياة أحلامى فى رضا ربنا يارب

عندك أمل ؟؟ أسبابك ؟
أكيد عندى أمل وألا مش هقدر أعيش لآن الحياه هى كلها آمال والا هنعيش نعمل أيه مجرد حيوانات ناكل ونشرب وخلاص..والأمل عندى بأهم حاجه قربى من ربنا وساعات بحس أن الأمل مجرد حياة أحلام
لما تحب تهرب من كل شئ بتروح فين؟
مشكلتى ما بعرفش أهرب من حاجه بجرب أقعد لوحدى أقعد برضه أفكر وما بعرفش أنام خالص.. بروح لحضن ماما أو أقعد مع أيمان بس لما بكون متضايقه أوى ما بتكلمش خالص وأٌقعد أكتم جوه نفسى لحد ما بتعب بس أكتر حاجه تريحنى أنى أروح أصلى وأقرى قرآن بحس براحه مفيش زيها

امتى أول مره خدت فيها نفس طويل كده وقلت بينك وبين نفسك يااااه الظاهر انا فعلا كبرت؟

لما كملت السنه اللى فاتت 21 سنه حاجه وحشه جدا ولما بقيت خاله من8 سنين بس ما يغركوش بصراحه هما مش مقتنعين أبدا أنى خالتهم وكل ما حد يقولهم كده ما يصدقوش مقتنعين أنى طفله زيهم ولما حد يقول ليهم على حاجه لا يقولوا عليه اشمعنه هى بتعملها ههههه

لما بتعمل عمل خيرى بيكون ايه هو دافعك الاول؟

دى من أحلى الحاجات فى حياتى أكيد رضا ربنا سبحانه وتعالى وأنى أقدر أرسم أبتسامه فى وجه طفل أو لأى حد وأدخل سعاده على قلب مسلم "إن الله فى عون العبد بدام العبد فى عون أخيه" ويارب يرزقنا دايما الأخلاص فى القول والعمل

بتشرب سجاير؟ لو الاجابه اه ايه شعورك لو شفت ست بتشرب سجاير؟ وليه؟
لا طبعا ..ونفسى أعرف أيه الجميل فى السجاير ..وأنا عموما ما بحبش الراجل اللى بيشرب سجاير لأنى بحس أن السجاير بتضيف حاجات وحشه لشخصيه الراجل مع الوقت وهى مجرد حاجه معلش وآسفه بس بتتحكم فى أنسان أضعف منها..ما بالك بقى لو ست بصراحه بحس أنها مش ست لآن الست يعنى أنوثه رقه أزاى بقى تشرب سجاير حاجه كده مقززه والله

بتعرف ايدك اليمين من الشمال ازاي؟

:):):):)مشكله ساعات بفتكر باكل بأيه وأعرفها منها وساعات بالساعه بعرف لكن قدام المرايه بقى ممكن أتلخبط

ايه اكتر اله موسيقيه بتحبها ؟
العود معرفش بحس أنه بيدخل جوايا أوى بحس بكل صوت فيه وكمان صوت رقيق

فى رأيك ليه الذوق والنخوه اتعدموا؟
لو أتعدموا يبقى مفيش رجاله فى مصر ..لا هما مش أتعدموا بس قلوا جدا فى الزمن ده لأن الراجل الحقيقى قل أوى الأيام دى

ايه الحاجه اللى لو حصلتلك تبقى سعيد قوى؟؟؟
أولا أنى أحسن أنى قريبه من ربنا أوى أوى وقدرت أرضى ربنا بجد وأنى مش مقصره فى حق ربنا عليه

وكمان لما أرضى أهلى ويدعولى دعوه جميله من قلبهم وأو أى حد يدعيلى دعوه بقلب
وكمان لما أقدر أحقق حياة أحلامى فى رضا ربنا

تختار يبقى عندك...ارض زراعيه ولا اجنس عربيات و لا كام عماره و لا فلوس فى البنك؟؟؟؟
مش عارفه هى الفلوس أتخلقت علشان نعيش بيها بس مش نكنزها وتعذبنا

أنا أهم حاجه عندى يبقى عندى ناس بحبهم ويحبونى حتى لو كنت فقيره ساعتها بس عموما أختار فلوس وساعتها أقدر أعمل بيها الحاجات اللى تعيشنى سعيده مع الناس اللى بحبهم..وهجيب عربيه علشان أبطل أخويا وجوز أختى يقولوا أن سواقه البنات متخلفه وما بيعرفوش يسوقوا

البحر و لا النيل؟؟؟

البحر علشان فيه حركه وموج مش حاجه ميته وبعدين بعشق منظر الشروق والغروب مع موسيقى هاديه جو بدييييع

مركب و لا طياره؟؟

بما أنى زهقت من ركوب الطيارات لما كنت قربت أكرها

نفسى بقى أجرب مركب بس ما يكنش عباره السلام وأغرق
:):):):)

مجنون و لا عاقل؟؟

نسيت تقول ولا طفل علشان أنا الناس دايما تقولى أنتى ساعه الطفوله طفله خالص فى كل حاجه وساعه الجد تفكيرك أكبر من سنك بكتير بس عموما نص مجنون ونص عاقل علشان ساعه ما أحب أبقى مجنونه وطفله أبقى وساعه العقل أبقى واحده كبيره

تقرأ كتاب و لا تتفرج عليه فيلم؟

ليه الأحراج ده بصراحه أنا بعترف أنى ما بحبش القرايه أوى يعنى بحب أقرى ميكى وبطوط ومجله ماجد
:):):):) وممكن قصه أو كتاب بس يكون قصه تشدنى .. بس الأفلام بحبها لما تكون قصه ليها معنى يعنى أفلام أجتماعيه رومانسيه مش زى أفلام هنيدى ومحمد سعد اللى مالهاش أى معنى.. بس أنا أنسانه سمعيه يعنى أحب أسمع أو أتفرج أكتر

بتمرر التاج لمين؟؟؟

كده يعنى والناس تدعى عليه بالتاج الصعب ده
كل الناس اللى لسه ما وصلهاش التاج ده يعنى لان أبو صلاح كان مرره للآغلب الناس

بس منهم

آلام وآمال- سوكه حبيبتى-عاشقه الوطن- قطه الصحراء- رفقه عمر-نسرين أمه الله-كيتى-أنين العروبه -بنلف فى دواير -الملاح التائه-بنات أفكارى-د.حندوله

amr-am i kind-mahmoud-momken 3ala esm masr- mo3az-son's egypt

مؤمنه- القلم السكندرى-حاول تفتكرنى -تامر نبيل -كفراوى- شريف الغريب-بنت مصر- رئيس جمهوريه نفسى- بهلول وبهلوله.
مش عارفه مين تانى كفايه تدبيس كده عموما أى حد هيدخل ومش مكتوب أسمه ولسه التاج ما وصلوش هيتدبس فيه

يلا سلاااااااااااااااااااااحف بقى

ملحوظه مع ..يتربى فى عزو

ملحوظه لابد منها علشان ضميرى يستريح للى قرى البوست واللى لسه هيقرا : بما أن محمد أخويا مع أنه كان عامل يضحك لما قرى البوست بس أنا لازم أقول كلمه الحق وهو علق على البوست بالكلام ده

al salam alikom,how are ou all? thx for the nice post my sister but i think u were not fair.if u think that iam Hamada Ezzo with my mother,what do u think about me ? is that the only place iam spoiled in it or what?i don't think iam spoiled and the evidence that iam a hard worker and i think a good man too.and also iam trying to make my future with my self without any help from my mother or my father and u know that...........any way thanks for your feelings but next time tell the wole truth please.thanks.Hamada Ezzo

وأنا هرد عليه

بجديا جماعه أنا لما أتكلمت ما أتكلمتش عن كون محمد أخويا مدلع بطريقه تافهه أنا بتكلم عن دلع ماما ليك علشان أنت الحيله والدلع بالكلام والفعل مش الدلع التافهه بس بجد يا جماعه محمد أخويا هو اللى أصر أنه يكون نفسه بنفسه وسافر وأتغرب علشان مش عايز يتجوز ويكون بيت بمساعده بابا وماما حتى لو كانوا قادرين كويس جدا على كده بس هو عايز حياته تبقى أتبنت على أيديه ومستقبله أتبنى على أيديه والحمد لله ربنا كان معاه وعرف يعمل اللى غيره أكبر منه مش عارفين يعملوه علشان معتمدين على باباى وماماى وهو دايما يقول لماما وبابا كفايه أنكم علمتونى وخلتونى راجل والكلام ده حقيقه بجد ويارب أن شاء الله يا محمد تلاقى الزوجه الصالحه اللى تستاهلك وتصونك وأنا قولت الكلام اللى يرضى ضميرى و أبقى عادله ويارب دايما اشوفك حماده عزو ههههههههه ومش عارفه مين حسدك والعربيه اتخبطت مرتين كله بسبب البدله الجديده شكلك فيها عسل أوى يا حبيبى ربنا يحميك يارب ويخليك لينا
:)

عدناااااااااااااااااااااااااااااااااا كانوا يومين حلوين أوى فى البلد نوع من التغير

أزيكم كلكم يارب يكون كان عيد سعيد على الكل مع أن فيه ناس كتبت ومخدتش منهم العيديه بس بما أن ماما حبيبتى رجعت من العمره بالسلامه الحمد لله لانها بجد كانت وحشانى جدا بس هى عندها عمره رمضان دى حاجه لا يمكن تفوتها أبدا وتقريبا بتنسانا وهى هناك بحبك يا ماماااااااااااااااااااااتى وشكرا على كل اللى سأل على وعلى ماما وعلق على البوست اللى فات وما ردتش ..الحمد لله وصلت الاراضى المصريه بسلام والبيت كله نور وانا بقى يعنى ماما عندى حاجه تانيه بما انى اخر العنقود فانا بقى بغير على ماما اوى بجد حتى من اخواتى وكمان من ولاد اختى اى حد يجى ناحيها بضرب فى المليان

المهم بقى أنا قولت اكتب حاجه خفيفه كده مش موضوع معين يمكن ما يهمش حد فيكم بس قولت أفضفض معاكم شويه.. اللى منكم اتفرج على مسلسل حماده عزو بتاع يحيى الفخرانى اللى دايما بيقول حاجه فى مسلسلاته انا مكنتش بتفرج على حاجه فى رمضان الا المسلسل وهو بيحكى عن أم وأبنها الوحيد بس هى مدلعها جداجدا لدرجه أنه بقى أنسان مستهتر وأب مستهتر بس هو عموما بيتكلم عن دلع الأم الزايد ده لانى حاسه انه جزء من بيتنا اصل أحنا عندنا فى البيت حماده عزو برضه ههههههه اخويا الوحيد اللى اكبر منى انا خلاص قررت أقوله حماده عزو ملحوظه " هو طول عمره من وهو صغير ما بيخليش حد يقوله حماده أبدا بيرفض أسم الدلع بيقول مفيش أحسن من أسم محمد " سواء ماما وبابا مدلعينه بطريقه فظيعه يعنى احنا كوم وهو كوم تانى

بس الفرق اللى بينه وبين حماده عزو أن الحمد لله محمد أخويا مش مستهتر بالعكس راجل وحاج كمان والحمد لله دكتور بس ما يغركوش كل ما أقوله حاجه بتوجعنى يقولى روحى لدكتور مؤمن بالتخصصات ههههه وبيتحمل المسئوليه كويس جدا لدرجه تخنق ساعات
:) وأحنا دايما كلنا جوه عنيه بما أنه اخونا الوحيد الحيله على رأى ماما ودايما تقولى ده اخوكى الولد ده اللى هيبقى ليكى وهتفرحى بدخلته عليك لما تتجوزى وتكبرى بس بجد هو قلبها هو نونه ماما مع أنه مترين الا 15سم بس مهما كبر ما بتشوفوش الا انه حته منها مع أنه بقى طولها مرتين أيام ما كان مسافر مش هقولكم كانت عامله أزاى بس يجى عند ماما وستوب بقى وانا بغير أشمعنه ماما تدلعه اوى واحنا ما ندلعش زيه ومهما أقولها مفيش فايده حتى بابا ما بيدلعش قده

وأنا من موقعى هذا أحتج وأحتج ليه الولد دايما يدلع أكتر من البنت وأكيد فيه بنات كتير ومنهم أصحاب كتير ليه عندهم فى البيت حماده عزو عايزه كل واحده تقول اللى فى قلبها ما تخليش فى نفسها حاجه وعايزه ولد فيكم لو وحيد أو مش وحيد يقول أنه مش حماده عزو فى البيت

إيه المجتمع الذكورى ده يعنى وهى مسافره تتصل بيه فى اليوم 4 او 5 مرات واحنا مره مرتين أشمعنه يعنى بقى وكمان عمرها ما بتخليه يمد أيديه فى حاجه فى البيت أبدا جتى لو كانت كبايه ميه ومحدش يقدر يقوله لا على حاجه مننا وأول ما يجى ولا يصحى عايز تاكل ولا تشرب حاجه طيب هدومك موبيلك تصوووووروا حتى الموبيل بتاعه لما بتحطهوله فى الشاحن وعيديه ياخد زيه زينا مع أنه بيشتغل أنا مش بحقد ولا حاجه ده حتى هو كريم خالص ومش بيأخر عن حاجه أبدا والله ولسه جايبلى موبيل جديد هديه وجايب لآختى كمان بس برضه بغير على ماما وكمان بقى بقى هو لو عايز حاجه يقدر يقنعهم بيها فى دقيقه وأكون انا بقالى سنه بقنعهم بيها زى العربيه تجيله وهو كان لسه فى الكليه انما انا لا نخاف عليكى وسواقه البنات متخلفه والكلام الغريب ده انا نفسى تسمعوا كلمات أغنيه حماده عزو والله بالضبط بس بجد محمد أخويا ده حبيبى يعنى لما كان مسافر بره والله مكنتش عارفه أعيش من غيره وكنت كل يوم أعيط عايزه يرجع ولو دخلت يا محمد وشوفت البوست بجد أنت أحلى وأحسن أخ فى الدنيا كلهاوبحبببك أوووى وربنا يخليك ليه وأبطل أنا وانت ناقر ونقير اللى أحنا فيه ده بس هذا لا يمعن أن ماما نونه مدلعاك زياده مع أنك بتكنر ويارب ماما نونه حبيبتى تبطل تدلعك شويه

شوفوا بقى الكلمات

يتربى فى عزو حماده عزو.. نونه على الحجر ماما تهزهه ..الناس يتغاظوا ما يتغاظوا على سنانهم كذوا ولا يهزو " مين بقى اللى بيكزوا"..اانكغه انكغه انكغه يا كلبوزه يا صغنن يا ابن المحظوظه مع نفسه دماغه مهويه ولا حاجه فى الدنيا تستفزه" هو فعلا ولا حاجه فى الدنيا تستفزه" ..يا سلام على الرجاله الجدعه فى مشاكله ماما تتصدره مش ناقص غير ياخد الرضعه وينادى لماما تغيرله ننوس عين مامته الحيله بسلامته أتمختر تاتا بقلاطه يا حماده هيقوموا حسادك ويفزوا ....... "حماااااااااااااااااده يا جامد

أمانه عليكم تدعوله علشان عنده أمتحانات الماجستير بتاعته الأيام دى وماما متوتره علشانه والنهارده كان عندهم شفوى والحمد لله عدى بسلام بس بصراحه كان شكله حلو أوى فى البدله وماما قعدت تقرى قرآن خايقه يتحسد :>

وليه كلام تانى فى كلمات نهايه المسلسل لأنها بتعبر عن حاجه فى مصر لو الواحد ركز فيها

طولت عليكم سلااااااااااااااااااااحف

أهلا أهلا بالعيد مرحب مرحب بالعيد ..هييه هييه هيييه

السلام عليكم

وخلص شهر الخير وخلصت أجمل أيام السنه ..خلص رمضان الخير والعباده ويارب نكون قدرنا نعمل ولو حاجه قليله لربنا ..بجد رمضان ده عدى بسسسسسسسرعه فجأه لقيته خلص ..يارب يبلغنا رمضان الجاى والكل بألف خير وسعاده اللهم آمين

وأهلا أهلا بالعيد مرحب مرحب بالعيد هيه هيه هيه العيد فرحه وأجمل فرحه تجمع شمل بعيد وقريب

وكل سنه والكل بألف خير ..وعيد سعيد على الجميع كل الناس الأمه الأسلاميه وكل المدونين وأهلى يارب كلهم وصحابى أحلى حاجه فى حياتى وربنا يخلى كل الناس لبعض ويارب كل الناس متجمعين وفرحانين بالعيد ويكتر أفراحنا ..وأسأل الله الذى أهل الهلال وأرسى الجبال أن يبلغكم العبد وأنتم فى أحسن حال وتبقى أيام جميله وسعيده على الجميع

هتوحشونى كلكم لأنى هشد الرحال ورايحين بيتنا اللى فى بلد بابا نقضى العيد هناك ..وبعدين أن شاء الله ماما هتوصل بالسلامه من العمره وهتشغل معاها لأنها بجد وحشتنى أوى أوى ربنا يخلى كل الأمهات

وبقولكم أيه اى حد هيكتب حاجه أنا عايزه العيديه ماليش دعوه كله إلا العيديه يارتنى أرجع طفله تانى كنت بلم عيديات قدددددددد كدددددده دالوقتى بدى ولاد اختى ويدوبك اخواتى وماما وبابا يدونى ...وأنا كعادتى هتواضع بقى هقدم السبت وهدي لكل واحد عيديه بس أياكم حد يسرق العيديه بتاعتى مااااااااااااشى ههههههه

..وأوعوا حد يفرقع بومب وصواريخ علشان أنا بخاف بجد

كل سنه وأنتم طيبين وعيد سعيد

10 جنيه بحالها شوفتوا أنا كريمه أزاى طووووول عمرى

لما نقرب أوى من بعض

كلمات أغنيه عجبتنى أوى أوى أوى لفيلم أحلام عمرنا وهى فعلا أحلام عمرنا وأكيد أى حد هيحسها أكيد هيحبها ولا إيه رأيكم ؟؟؟لأن كلامها بجد حقيقى أوى وجميل وواقعى وأثر فيه من جوايه أوى لمس حاجه من جوه حبيت كل الناس تقراها علشان كلنا نحسها

لما نقرب قوى من بعض وأما بجد نخاف على بعض ......ممكن نعلى حقيقى ونقوى ونصبح أقوى شعوب الأرض

لما بايدنا نأكل روحنا... لما نفوق ونداوى جروحنا ..واما أنا تتحول أحنا ...ونصلح أخطاءنا بجد... ممكن نعلى حقيقى ونقوى ونصبح أقوى شعوب الارض ونصبح أقوى شعوب الأرض

لما نحب بجد عملنا ..وأما نقول احنا اللى عملنا..ولما نلاقى فى بكرة آمالنا ..ولما نبطل خوف من بعض. لما نعمر أرض بلادنا

لما نعلم صح ولادنا... لما يعود من تانى بلادنا... لما نصدق كلمة بعض... ممكن نعلى حقيقى ونقوى ونصبح أقوى شعوب الارض ونصبح أقوى شعوب الارض

لما نقرب قوى من بعض وأما بجد نخاف على بعض ممكن نعلى حقيقى ونقوى ونصبح أقوى شعوب الارض

فى الأخر يارب نقدر نكون كده كلنا ونكون أيد واحده وأحنا هنبقى أحسن وأقوى شعوب الأرض أن شاء الله ويارب يبلغنا ليله القدر وأمانه الدعاء وكل رمضان والكل بألف خير ويارب نعتق كلنا من النار ويرزقنا الفردوس الأعلى يارب

"يوم فى الجنه"

السلام عليكم

كل سنه والكل بخير ..يارب يكون رمضان جميل وكله عباده وفرحه وحاجات جميله على الكل يارب

أنا كتبت البوست ده مخصوص لأنى بجد مبسوطه وفرحانه أوى من أمبارح بطريقه محدش يتخيلها حاسه أنى هطير من السعاده..أنا كنت مش هكتب فى رمضان حاجه لأنى مشغوله بس بجد من كتر فرحتى عايزه الكل يفرح زى

طبعا الكل بيسأل أيه الفرحه الغريبه دى وإيه العنوان ده "يوم فى الجنه "بس بجد فعلا أمبارح كان يوم فى الجنه كأن الجنه على الدنيا أنا كنت قولت ليكم على الأسره الخيريه اللى عاملها أنا وصحابى أحنا دايما بنعمل أفطارات جماعيه مع أطفال الجنه أمبارح بقى كنا عاملين أفطار جماعى مع "أطفال الجنه" واللى ميعرفش مين أطفال الجنه هقول هما مين مع أنى بحب أسم أطفال الجنه أكتر وعمرنا ما بنقول عليهم غير أطفال الجنه اللى هما الأطفال الأيتام والمعاقين والمكفوفين ومرضى السرطان ... الحمد لله كنا أمبارح منظمين أفطار جماعى يضم 420 طفل من أطفال الجنه وبجد يا جماعه كان يوم مش قارده أوصفه كلنا كنا بنطير من السعاده مع الكل التعب اللى أحنا كنا فيه فى التنظيم وفرحتنا وأحنا بنكيس الهدايا و أننا نلعب الأطفال فى الملاهى والتنظيم ساعه الفطار وبعد الأفطار نودى بقيه الأكل مستشفى السرطان بس كان قلبنا بيرفرف من جوانا كل واحد فينا كان مش عارف يعمل إيه ولا إيه ومع أننا كلنا تقريبا ما فطرناش خالص لحد ما رجعنا بيوتنا علشان كنا مشغولين فى مليون حاجه بس من كتر الفرحه علشان الأطفال فرحانين مكناش حاسين ولا جوع ولا عطش ولا أى حاجه مش حاسين الا بوجوه بريئه بتضحك وسعيده وعيون أطفال فرحانه ..

وخصوصا ساعه ما كرمنا الأطفال الأيتام والمكفوفين المتفوقين علشان نقول ليهم أن بكره أحسن وأن محدش أحسن منهم حتى لو كان دكتور جامعه يتكرموا زيهم زى أى حد ...تعرفوا كلنا عيطنا ساعتها علشان سعاده طفل لما 600 واحد بيسقف ليه بيقوله برافو بيخليه يشوف بكره أحسن ويشوف حلمه الجميل لبكره

يا جماعه الأحلام مش مستحيله الأسره اللى أنا فيها أنا وصحابى والله كنا كلنا 3 بس فى الأول وكان حلمنا على قدنا دالوقتى الحمد لله عملنا كل حاجه كنا بنحلم بيها واللى أكتر كمان من حلمنا شنط الخير الشهريه ودفع مصاريف وتجهيز عرائس أيتام وأفطارات وعملنا أوض لعب للأطفال فى المستشفيات وأيام وأيام فى الجنه وحاجات كتير بفضل ربنا الحمد لله وإن شاء الله هنبدأ فى تنظيم هدوم العيد والعيديات ولاوازم المدرسه ل 1000 طفل من أطفال الجنه أدعولنا نقدر نعمل عملنا على أحسن وجه.. وهما حبه صبر حبه حماس يبقى الحلم صوره وصوت

أنا ما كتبتش البوست ده علشان أٌقول أحنا بنعمل حاجه لا علشان أقول لكل الناس الخير من أحسن الحاجات اللى فى الدنيا دعوه للخير

يا جماعه أنا عايزه كل واحد فينا اللى جرب يعمل خير يكمل ويحلم ويحلم وهيقدر واللى مجربش يجرب يعمل خير صدقونى هيلاقى سعاده عمره فى حياته ما يتخيل أنه هيبقى مبسوط أكتر من كده لما يشوف طفل مبسوط أو بيقوله يا ماما وبابا جربوا وأنتو مش هتقدروا تتنازلوا عن الفرحه الكبيره جدا دى هتبقى كل حته فيكم فرحانه حتى لو كان جسمكم مفيهوش حته الا تعبانه بس الفرحه بتنسى كل حاجه

رمضان والسنه كلها مش بس عباده ..الخير لازم يكون جوانا كلنا كل ثانيه محسوبه من عمرنا عند ربنا والخير مش فلوس الخير مجرد انك حتى تتعب بمجهودك وقتك هو أهم حاجه تقدر تعمل بيها خير
وفى الأخر عايزه أقول لكل صحابى وأخواتى اللى شاركونى يوم فى الجنه يوم كان أجمل وأجمل وأحنا مع بعض لان أيد لوحدها ما تصقفش وأيد على أيد تشيل وطول ما الايد فى الايد هنفضل نحلم مش هنخاف حتى لو عايزين الشمس هنطولها ان شاء الله وهنحقق أحلامنا طول ما ربنا دايما معانا واللى هما كتيرجداجدا دول بس حبه صغيره جدا جدا منهم بس هقول اللى منهم مدونين

أولا اللى كان مسئول عن التنيظم العام لليوم أخويا فى الخير ملتقى المجانين

أخويا فى الخير الفدائى ههههه اللى كان بيلعب الأطفال فى الملاهى أنين العروبه

حبيبتى وأوحى عاشقه الوطن

سوكتى الجميله وأوحى برضه الدنيا ريشه فى هوا

وأخويا فى الخيرالحاضر معنا مع أنه غايب عننا الملاح التائه

وأخويا فى الخير بنلف فى دواير

يا شباب الخير بحبكم أوى وربنا يخليكوا ليه يا أحلى أصحاب وأخوات فى الدنيا ..وجمعنا ولمتنا فى الخير من أجمل الأوقات فى حياتى أنتو من أغلى الحاجات اللى حصلت ليه فى حياتى

حياتى قلبكم مكنتش حياه

ويارب دايما جمعنا ما تفرقناش

ويارب يرزقنا دايما الأخلاص فى القول والعمل ويجعله فى ميزان حسناتنا ويرزقنا الجنه يارب العالمين

سأعبدك يارب كما لم أعبدك من قبل

رمضان كريم

هييييييييييييييييييييييه هييييييييييييييييييييه رمضان جه والفوانيس أتنورت والقلوب كلها لربنا أتفتحت والناس أتجمعت ومصر الجميله بخير والجوامع أزدحمت مع أن المفروض على طول

أجمل شهر فى السنه هل علينا بخيره وجماله وروحنياته بجد من قبل رمضان بكام يوم وأنا حاسه براحه من جوايه كبيره جداوفرحه كبيره جدا من جوايه أيوه كل سنه بفرح بس السنه دى فرحه كبيره أوى حاسه أن رمضان عيد من قبل ما يبدأ يارب يكون شهر خير وعباده على الجميع يارب وكلنا نقرب من ربنا أكتر وأكتروأدعولى كلكم أقرب من ربنا أكتر وأكتر ومش هتكلم عن أفضال الشهر الكريم ناس أحسن منى كتيره أتكلمت عنها وأكيد كلنا عارفنها بس أهم حاجه نصوم كلنا بجد مش صيام بطن وخلاص كل حاجه فينا تصوم العين والسمع والكلام وكل حاجه ونقدر نصوم رمضان أيمانا وأحتسابا يااااارب وعايزين كلنا نقول

"سأعبدك يارب كما لم أعبدك من قبل"

معلش أعزرونى كلكم عن أنشغالى الشهر ده ويارب يتقبل منا ومنكم صالح الأعمال وعايزه أدعوكم كلكم مش بس للصيام والقيام وقراءه القرآن
بس كمان عايزين كلنا نعمل خير حتى لو بأقل حاجه عندنا نفطر صايم نرسم بسمه على وجه يتيم وشنط رمضان ونسعد أطفال السرطان فيه حاجات كتير نعمل فيها خير

وبجد يا جماعه عمل الخير بيدى روح تانيه لكل واحد وبيداوى الروح والقلب من جوه غير جزاء ربنا تقدروا تداوا أى حاجه بعمل الخير والصدقه ..أنا الحمد لله بقالى أكتر من 3 سنين بشتغل أنا وصحابى وعاملين أسره خيريه صغيره فى الكليه وأول ما بدأنا العمل الخيرى مكنش معانا أى ماديات نبدأ بيها ومكنش عندنا أمل بس الحمد لله وسبحان الله مصر لسه كلها خير علشان كنا عايزين نعمل حاجه بجد بجد والله والله ربنا دايما كان فى الأنتظار وقدرنا الحمد لله نعمل حاجات كتيره جدا بفضل ربنا أفطارات لايتام وأطفال السرطان وشنط رمضان وحاجات كتيره جدا على مر السنه وكل ده بفضل ربنا

يلا يا جماعه عايزين كلنا نعمل خير وكل واحد يبدأ حتى لو بحاجه صغيره وصدقونى والله هتلاقى خير مش هتتوقعوا وربنا دايما هيكون فى الأنتظار
للمره التانيه كل الناس تعزرنى لو أنشغلت علشان غير أن كلنا مشغولين فى العباده والمطبخ بقى والمواعين ههههه كمان شغل الأسره الخيريه ورانا شغل كتير جدا فى رمضان بسبب خير الناس الكبير دايما وأدعولنا بجد نقدر نعمل كل اللى بنحلم بيه ونسعد ناس على قد ما نقدر بس أكيد لو حصل حاجه تستاهل أكتبها وأحكيها من هتأخر
وأن شاء الله هبقى أحكيلكم عن باقى وكل التجربه بتاعت الأسره الخيريه دى علشان بجد حياتى قبلها مكنتش حياه ودى الكلمه اللى بقولها على طول
يلا كلنا نعمل خير
وكل سنه والكل بألف خير يارب
وكل عام وأنتم إلى الله أقرب ولطاعته أدوم

تقبل الله منا ومنكم صالح الأعمال

بلدنا أمانه فى أيدينا

السلام عليكم

أولا أزيكم كلكم يارب تكونوا كويسين وكل سنه والكل بخير لأن شهر الخير قرب خلاص وربنا يهدينا يارب وكلنا نرفع شعار سأعبدك ياربى كمان لم أعبدك من قبل

أنا عايزه أقولكم أن انا من يوم ما كتبت أخر بوست وأنا عامله أفكر هكتب أيه المره الجايه لآنى لسه جديده فى عالم التدوين ومعنديش موهبه أوى قعدت أفكر كتير وكنت عايزه أكتب على حاجه غاليه علينا علشان ندعلها فى رمضان

حاجه تعتبر أمنا كلنا ولقيت اللى مش ممكن يختلف على حبها " مصر اللى هى أغلى أسم وجود وأسم مخلوق للخلود

"أنا مش عامله البوست ده علشان أكتب فى السياسه مش علشان خايفه لا سمح الله لأنى مش بخاف الأ من ربنا بس يمكن فى بلوجات كتير وأحسن منى أتكلمت فى السياسه كتير جدا

أنا كنت عايزه أكتب بوست فى حب مصر اللى الكل دالوقتى مش فاكر ألا عيوبنا .. مع أن مصر مالهاش دخل أنها وصلت لكده العيب مش فى مصر العيب فينا أحنا

ساعات بقعد أفكر أقول ليه أشمعنه مصر اللى بيجرى ليها كده لقيت أننا برضه أكيد مقصرين فى حق مصر معرفش كل واحد وجه تقصيره أيه بس اللى أكيد أننا مقصرين فى حقها

لو كل واحد أشتغل بجد بذمه وأدى عمله حقه مكناش وصلنا لكده حتى لو كان فيه نظام بيوصلنا لكده بس أتقان العمل دى حاجه من طبع الآنسان ومن دين الأنسان وحاجه فى كل الأديان

أنا مش هعيش على ذكريات الماضى وأقعد أقول الفراعنه والكلام اللى مودينا فى داهيه ده أننا عايشين على زكريات الماضى أنما بنعمل ايه دالوقتى ؟؟؟؟؟؟

لو كل واحد عمل اللى عليه هنقدر نعمل حاجه لمصر والله هنقدر نعمل ولو حاجه صغيره لان مصر أمانه فى أيدينا أحنا

معرفش ليه كل ما أسمع أغنيه عن مصر أو كلام عن مصر أعيط بجد بتصعب عليه مصر أوى يمكن علشان أنا مجربه الغربه 10 سنين أيوه كنت صغيره بس بجد أحساس تانى وانا فى مصر كل نفس فيه بيحس بامان فى مصر

ليه يا جماعه معدناش بنفتكر لمصر ألا البطاله الا الفساد الا ... الا .... الخ دى حاجه مش عيب فى مصر.. مصر كبلد الناس الطيبين الناس اللى عمرى فى حياتى ما شوفت وشوش طيبه زى وش المصرى .. الراجل المصرى الجدع اللى مفيش زيه والله فى الدنيا كلها حتى بسمراه بكل حاجه فيه بأخلاقه الجدعنه الشهامه ..البنت المصريه اللى بجد الجدعه اللى ساعه الجد بميه راجل..مصر اللى فيها المسيحى زى المسلم فيها وتلاقيهم يخافوا على بعض زى الأخوات بجد..الشوارع اللى بتحس بالحياه فيها الناس اللى ساعه الفرح أيد واحده وساعه الحزن برضه أيد واحده

بحس أن مصر هى أرض المحبه والله وأتحدى أى واحد ما يقولش أن مصر هى روحه من غير شعارات ولا كلام فراغ

أنا عن نفسى بقعد أقول لماما ياااه بقى أنا عايزه أسافر أنا أتخنقت من الزباله من عدم تقدير الموهبه من عدم التقدير لكل حاجه من ومن ومن من كل حاجه الناس مخنوقه منها وماما تقعد تقولى للدرجه دى أحساسك تبلد بمصر وتقولى على تاريخ مصر وأقولها بلا دوشه بس والله والله كله كلام عيال كلنا عيال فى كلامنا بس لما بحس أنى ممكن أبعد عن مصر ببقى عامله زى الطفله اللى بتوه عن ماماتها

بجد يا جماعه بتوجع أوى لما بحس ان بقى فيه مصرين عنده جفا فى حب مصر .. من كام يوم أِشتلغت أغنيه ما شربتش من نيلها بتاعت شرين أول ما قالت ما شربتش من نيلها والله كل اللى كان قاعد قالوا طفحنا من نيلها يااااه ليه وصلنا لكده مصر مش وحشه أوى كده وذنبها أيه هى أن العيب فى كل واحد فينا اللى بيقصر فى عمله

والله مصر دى الحضن الدافىء ومحدش هيحس أوى بالكلمه دى ألا لو أتغرب هيشوف أحلى منها كتير بس مش هيحس بحب ألا لمصر مش علشان هى أحلى بلد فى الدنيا بس علشان أمنا زى ما أحنا بنحب مامتنا مش علشان أحلى واحده فى الدنيا بس علشان أمنا

بجد مش كلام أغانى جربت فى عز ما تحزن تمشى فى شوارعها وتشكى ليها حتى لو أوسخ شوارع فى الدنيا يا جماعه دورا جواكم هتلاقوا هى الصحبه وهى الآهل هى كل حاجه من جوانا هى كل ذكرياتنا حتى لو كانت ذكريات وحشه

والله يا جماعه مدام بنحب بلدنا يبقى هتتغير بأيدينا..أحنا اللى نعليها بأيدينا نخليها أجمل لينا وللأولادنا

ومصر دايما يفوت عليها المحن ويفوت عليها الزمان وهى أغلى وطن وهى أعلى مكان حتى لو بقت أفقر بلد فى الدنيا

ياريت لما حد يعيب فى حاجه ما يعبش فى مصر يعيب فى اللى وصلوا مصر لكده وأولهم كل واحد فينا ومحدش ينكر أن كل واحد مقصر بدليل أن أول حاجه بتجى بتفكرنا من زهقنا نسيب مصر ونطفش مش هو ده الحل أيوه ده ساعات بيبقى واقع علينا بس مفيش حد يقولى أنه معدش عنده أحساس بمصر

مش هتلاقوا مثالها دى ست كل عصر

يااااه بجد نفسى أحقق حياة أحلامى اللى بحلمها لمصر نفسى أوى أوى بس مش هنعرف نعمل حاجه لمصر الا لما يكون حبنا ليها هو بعد حبنا لربنا ودينا واهلنا

يا جماعه كفايه آيات فى القرآن عن مصر أعتقد أن مفيش بلد ذكرت فى القرآن أكتر من مصر

فَلَمَّا دَخَلُواْ عَلَى يُوسُفَ آوَى إِلَيْهِ أَبَوَيْهِ وَقَالَ ادْخُلُواْ مِصْرَ إِن شَاء اللّهُ آمِنِينَ (يوسف 99 )
صدق الله العظيم

أما عن رسول الله صلى الله عليه و سلم فى ذكر مصر
قوله صلى الله عليه و سلم (ستفتح عليكم بعدى مصر فاستوصوا بقبطها خيرا فإن لكم منهم ذمه و رحما ) رواه مسلم.
و قوله صلى الله عليه و سلم (إذا فتح الله عليكم مصر فاتخذوا بها جندا كثيفا فذلك الجند خير اجناد الأرض ، قال أبو بكر لم يا رسول الله؟ قال لأنهم و أزواجهم فى رباط إلى يوم القيامة

صدق رسول الله صلى الله عليه وسلم

مش قادره أقول كلام تانى أحلى من كده

غير بحبك يا مصر مهما قالوا ومهما عملوا

عارفه ان فيه ناس مش هيعجبها البوست وهتقول أهو كلام والله أنا عارفه كل مشاكل الحياه فى مصر لأنى عايشه فيها أنا مش بتكلم عن مشاكل أنا بتكلم عن حب مصر وبس

بس مصر هى الوطن للى يعرف معنى الوطن

ياااارب يكون كلامى خفيف عليكم وكل سنه وأنتو بألف خير